Sýretshi aınalasynan sezim qylyn shertetin názik ıirim izdeıdi. Tirshilikke araı syılaǵan ásem gúlder onyń kenebinde tipten qulpyra túsedi. «Raýshan gúli», «Baqshadaǵy kóktem», «Qashqargúl men záıtún» sekildi týyndylar Svetlana Kakotkınanyń eń tańdaýly jumystary. Á.Qasteev atyndaǵy óner mýzeıinde qylqalam sheberiniń «О́mir ıirimi» atty kórmesi ashyldy.
О́ner jármeńkesine sýretshiniń ártúrli mánerde oryndalǵan 34 grafıkalyq jumysy qoıylǵan. Jyldar bederinde qattalǵan úlken izdenisti kórsetetin shyǵarmashylyq baıan «О́mir ıirimi» dep atalýy jaıdan-jaı emes. Avtor úshin ómir yrǵaqtaryn quraıtyn keneptegi syzyqtar – ózin tolǵandyratyn kúıler men emosııalardy jazyqtyqta beıneleýdiń negizgi tásili. Shyǵarmalardyń kórkemdigin arttyryp, kompozısııasyn ashyp turǵan da san taraý syzyqtar álemi.
Kórme jetekshisi Sholpan Nuǵymanovanyń aıtýynsha, grafıkalyq tehnıkasy ártúrli bolǵanymen, Svetlananyń súıikti materıaldarynyń biri – týsh, qalamush. Onyń týyndylary syzyqsha, núkte, daq pen syzyqtar negizinde kenepke túsedi. О́ner ıesi keskindelgen beınelerdi óziniń plastıkasymen jandandyrady. Osylaısha túrli-tústermen tolyqtyrylǵan tik, dıagonaldy syzyqtar shyǵarmaǵa jan bitirip, kórermenge erekshe áser syılaıdy.
– «Almaty aspany», «Aýrýhana terezesinen» sekildi peızajdyq jumystar men «Túımadaqtar», «Raýshan gúli» dep atalǵan gúlder kompozısııasynyń toptamasy alýan sezimder men kóńil qobaljýlarynyń úılesimindegi tabıǵattyń jarqyn kórinisine basa nazar aýdarady. Sol arqyly peızaj lırıkasynyń tereńine tartady, kórermenin ıirip áketedi, – deıdi Sholpan Nuǵymanova.
Sóz basynda aıtyp ótkenimizdeı, onyń shyǵarmalary náziktikten nár alǵan. Týyndylarda kóktem kúniniń áýezdi dybystary paıda bolady, dala gúlderiniń hosh ıisi seziledi, qustardyń úni estiledi. Munyń bári álbette kórermenniń qýanysh sezimin oıatary anyq. Al Kakotkınanyń sıýjettik sýretterinen ómir men bolmys taqyrybyndaǵy fılosofııalyq tolǵanystar men avtorlyq paıymdardy baıqasaq, lırıkalyq mazmundaǵy shyǵarmalarynda kompozısııa men formalardyń yqshamdylyq úılesimdiligi aıqyn kórinedi.
Sonymen qatar Svetlana Kakotkına kóńildiń keıbir sátterinde óleń jazady. О́leńder jınaǵyna ıllıýstrasııalar jasaý sýretshini Á.Qasteev atyndaǵy Memlekettik óner mýzeıinde debıýttik jeke kórmesin ótkizýge rýhtandyrǵan. Sýretshiniń kóńil terezesinen ómirdiń jarqyn boıaýlary kórinip, sulýlyq, tazalyqtyń jupar lebi esedi.
ALMATY