Qurmanǵazynyń «Adaıy», kúısandyqta sheber oryndalǵan Shopenniń shyǵarmasy kıeli Túrkistan aspanynda qalyqtady. Ustazdar men mektep oqýshylary halyq aspaptar orkestriniń oryndaýyndaǵy kúıler, kúısandyqqa jan bitirgen toǵyzynshy synyp oqýshysy Shuǵyla Ábilqasynyń sheberligi kópshilikti tánti etti. Qazylar alqasynyń múshesi, «Jigitter» kvartetiniń ánshisi Aıdar Turǵanbektiń óneri de kórermen kóńilin kóterdi.
Osylaısha, Túrkistan qalasynda «Túrkistan: kóne men keleshek kópiri» atty jańa oblystyq óner festıvaliniń qalalyq kezeńi bastaý aldy. Aýdan, qalalyq irikteý kezeńi jas ónerpazdardyń shabytyn shyńdap, úlken sahnaǵa jol ashpaq. «Aqjaıyq» mýzyka mektebinde ótken keshte túrkistandyq talanttar ónerlerin qazylar alqasynyń synyna saldy. Jas ónerpazdardy qoldaýǵa kelgen oblys ákimi О́mirzaq Shókeev jastardyń tanylýyna jol ashatyn óner dodasynyń qatysýshylaryna sáttilik tiledi. «Eldegi karantın shekteýlerine baılanysty oqýshylar ónerin kópshilik aldynda keńinen kórsetýge múmkindikter bolmaýda. Degenmen Túrkistan qalasynda bastaý alyp otyrǵan óner festıvali ári qaraı aýdan, qalalarda jalǵasyn tabady. Búgingi óner dodasyna qatysqan barlyq jas daryndarǵa sáttilik tileımin. Shyǵarmashylyqta ónerlerińiz shyńdalyp, bıik belesterden kórinýge tilektespin!», dedi О́mirzaq Shókeev.
Jas talanttar festıvalinde «Symbat» bı toby «Shashý» bıin bılep, túrkistandyq oqýshylar men Túrkistan saz mektebiniń ustazdary birlese saksafon, fleıta, roıal, barabanda oınap, óz ónerin kórsetti. Sondaı-aq, «Shabyt» dombyrashylar ansambliniń oryndaýynda «Nár aǵashy» kúıi kórermen nazaryna usynyldy. Halyq aspaptar orkestriniń kvarteti kúı tartyp, «Bolashaq» vokaldy toby, balalar men jasóspirimder ortalyǵynyń kvarteti ánnen shashý shashty.
Aıta ketelik, óńirde 8 óner mektebi, 13 saz mektebi jumys isteıdi. Onyń ishinde «Aqjaıyq» saz mektebin erekshe atap ótýge bolady. Mektep zamanaýı úlgidegi mýzykalyq aspaptarmen jabdyqtalǵan.
Túrkistan oblysy