Shymkent qalasynda qoǵamdyq kólik júrgizýshileriniń mádenıeti men biliktiligin arttyratyn joba qolǵa alyndy. Endi qoǵamdyq kólik júrgizýshileri 5 kúndik oqý kýrsyna qatysyp, arnaıy mamandardardan «jolaýshylardy tasymaldaý erejesi» jáne múmkindigi shekteýli jandarǵa qyzmet kórsetý boıynsha bilim alady, dep habarlaıdy Egemen.kz.
Bul jóninde qala ákimi Murat Áıtenov «Instagram» jelisinde tikeleı efır arqyly turǵyndarmen kezdesýinde qoǵamdyq kólik máselesin talqylap, saladaǵy birqatar jańalyqtarymen bólisti.
Jańa jobaǵa qatysqan júrgizýshi qyzmettik tártipti saqtaý, jolaýshylarǵa sypaıylyq tanytý men psıhologııalyq daıyndyq jáne keleńsiz jaǵdaı týdyrmaıtyn jaǵdaı jasaýdy úırenedi. Oqýdan ótkenderge mindetti túrde sertıfıkat beriledi. Aıta keteıik, sertıfıkaty joq júrgizýshiler qoǵamdyq kólikti basqarý qyzmetine ornalasa almaıdy.
Sertıfıkat tabystalǵannan keıin júrgizýshi tarapynan eńbek tártibin buzý jaǵdaıy oryn alsa, qaıta attestasıalaýdan ótý mindetteledi. Al, etıkalyq normalar men eńbek tártibin birneshe ret buzǵandar qyzmetten bosatylyp, aldaǵy ýaqytta qoǵamdyq kólikti basqarý qyzmetine ornalasý qıyndatylady.
Qaladaǵy jolaýshylar men júrgizýshi arasynda qandaıda bir máseleler oryn alsa nemese qosymsha suraqtar boıynsha jolaýshylar kóligi jáne avtomobıl joldary basqarmasynyń 24-75-17 baılanys nómirine habarlasýǵa bolady.