Premer-Mınıstr Asqar Mamın jańartylǵan quramda Úkimettiń alǵashqy otyrysyn ótkizdi, dep habarlaıdy Egemen.kz.
Jańa taǵaıyndalǵan ulttyq ekonomıka mınıstri Áset Erǵalıev pen eńbek jáne halyqty áleýmettik qorǵaý mınıstri Serik Shápkenov memlekettik qyzmetshi retinde ant berdi.
Otyrysta eldegi sanıtarlyq-epıdemıologııalyq jaǵdaı qaraldy. Densaýlyq saqtaý mınıstri Alekseı Soı, ishki ister mınıstri Erlan Turǵymbaev, aqparat jáne qoǵamdyq damý mınıstri Aıda Balaeva, Nur-Sultan qalasynyń ákimi Altaı Kólginov, Pavlodar oblysynyń ákimi Ábilqaıyr Sqaqov, Aqmola oblysynyń ákimi Ermek Marjyqpaev, Qostanaı oblysynyń ákimi Arhımed Muhambetov, Atyraý oblysynyń ákimi Mahambet Dosmuhambetov baıandama jasady.
Qazirgi tańda Covid-19 taralý qarqyny boıynsha QR-nyń 6 óńiri «qyzyl aımaqta» tur, atap aıtsaq: Aqmola, Atyraý, Qostanaı, Pavlodar, Soltústik Qazaqstan oblystary jáne Nur-Sultan qalasy. «Sary aımaqta» — Batys Qazaqstan, Almaty jáne Qaraǵandy oblystary.
Respýblıka boıynsha vırýstyń reprodýktıvtik kórsetkishi 1,1-di quraıdy. Infeksııalyq tósek oryndardyń júktemesi – 32%, reanımasııalyq tósek oryndar – 23%. QazCovid-in otandyq vaksınasy klınıkalyq synaqtardyń III kezeńinen ótýde (aldyn ala tıimdiligi – 96%). «Spýtnık V» vaksınasynyń sapasyn attestattaý jumystary júrgizilip jatyr. GMP standarty bar vaksınalar shyǵaratyn bıofarmzaýyt salynyp jatyr.
«Búgingi tańdaǵy eń mańyzdy mindet – halyqty jappaı vaksınalaýdy uıymdastyrý», — dedi A. Mamın.
Úkimet basshysy Densaýlyq saqtaý mınıstrligine ákimdiktermen birlesip, 1 aqpannan bastap medısınalyq uıymdardyń halyqty «Spýtnık V-men» jappaı vaksınalaýdy bastaýǵa daıyn bolýyn qamtamasyz etýdi tapsyrdy.
Premer-Mınıstr óńirlerdiń ákimderine epıdemıologııalyq ahýal nasharlaǵan jaǵdaıda aldyn ala shekteý sharalarynyń josparyn ázirleýdi, halyq pen bıznes sýbektileriniń belgilengen sanıtarııalyq normalardy qatań saqtaýyn qamtamasyz etýdi, bir apta merzimde ınfeksııalyq stasıonarlar men alǵashqy medısınalyq-sanıtarııalyq kómek uıymdarynda jeke qorǵanysh quraldary men koronavırýsqa qarsy dári-dármek qorlaryna tekseris júrgizýdi tapsyrdy. Ishki ister mınıstrligine ákimdiktermen birlesip, monıtorıngtik toptardyń jumysyn kúsheıtý, Aqparat mınıstrligimen birlesip túsindirý jumystaryn kúsheıtý tapsyryldy.