Zań qaraǵa da hanǵa da ortaq. Alaıda, Semeı qalalyq máslıhatynyń depýtattary 7 shaqyrylymnyń alǵashqy sessııasynyń otyrysynda maskasyz sýretke túsken, dep habarlaıdy Egemen.kz
Esterińizde shyǵar, jýyqta Zaısan, Aıagóz aýdandarynda quqyq qorǵaý qyzmetkerleri aı dalada maskasyz júrgen turǵyndarǵa 41 myń teńgeniń aıyppulyn arqalatqan. Al, maskasyz, ara qashyqtyqty saqtamaı otyrǵan depýtattarǵa qandaı shara qoldanylady? Oblystyq taýarlar men qyzmetterdiń sapasy men qaýipsizdigin baqylaý departamentiniń baspasóz qyzmetiniń habarlaýynsha, algorıtmge sáıkes polısııadan raport túspese, ákimshilik is qaralmaıdy. Ázirshe anyqtaý, tekserý jumystary júrip jatqan kórinedi.
Semeı qalalyq máslıhatynyń hatshysy Beısenbek Aqjalovtyń áleýmettik jelilerdegi, saıttardaǵy pikirine súıensek, qalalyq máslıhat depýtattary eki ret fotoǵa túsipti. Birinshisinde betperdemen eken. «Budan keıin depýtattar estelik úshin betperdesiz sýretke túseıik dedi. Aramyzda eki-úsh dárigerler bar. Olar «Shamamen 30 sekýnd tynysymyzdy tartyp, demalmaı turaıyq, bizdi tez sýretke túsirip alsyn» dedi. Munda turǵan ne bar? Tek betperdemizdi sheshtik te, sýretke tústik, birden kıip aldyq», deıdi B.Aqjalov.
Bul jaǵdaıǵa baılanysty Semeıdegi sanıtarııalyq-epıdemıologııalyq baqylaý departamentiniń basshysy Berik Tilebaldın munyń durys emestigin aıtady.
– Ispen aınalysyp jatyrmyz. Máslıhat hatshysy jaýap berýi tıis. Olar betperdeni tez sheship, tez kıdik dep otyr. Bul, árıne, durys emes. Qazir áleýmettik qashyqtyqty qatań saqtaýymyz kerek. Barlyq jerde betperde kııý rejımi, - dedi Semeı qalalyq sanıtarııalyq-epıdemıologııalyq baqylaý departamentiniń basshysy Berik Tilebaldın.
Shyǵys Qazaqstan oblysy