Keshe Aqordada Elbasy Nursultan Nazarbaev Qazaqstan Respýblıkasynyń Ulttyq merekesi – Táýelsizdik kúni qarsańynda bir top azamatqa memlekettik, qoǵamdyq jumystar men ǵylym men ónerde qol jetkizgen aıryqsha tabystary úshin Memlekettik syılyqtar men ataqtar tapsyrdy.
Keshe Aqordada Elbasy Nursultan Nazarbaev Qazaqstan Respýblıkasynyń Ulttyq merekesi – Táýelsizdik kúni qarsańynda bir top azamatqa memlekettik, qoǵamdyq jumystar men ǵylym men ónerde qol jetkizgen aıryqsha tabystary úshin Memlekettik syılyqtar men ataqtar tapsyrdy.
Elbasy N.Nazarbaev aldymen jınalǵandardy elimizdiń eń basty merekesi – Táýelsizdik kúnimen quttyqtady. Qazaqta «Eńbegine qaraı qurmeti» degen qanatty sóz bar. Qalyptasqan dástúr boıynsha men búgin – Qazaqstannyń ulyq merekesiniń qarsańynda elimizge aıryqsha eńbek sińirgen azamattarǵa memlekettik marapattar tapsyramyn, deı kelip, Prezıdent Memlekettik syılyq memlekettiń ósip-órkendeýine jan aıamaı úles qosyp júrgen azamattarǵa beriletinin atap kórsetti. Ony jeke azamattyń ǵana emes, tutas elimizdiń tabysy dep sanaý kerek. Búgingi baǵyndyrǵan bıikterińiz ár ýaqytta sizder úshin baıandy bolsyn.
Osylaı degen Elbasy Memlekettik syılyq alǵan azamattardy shyn júrekten quttyqtady. Odan ári ol tatýlyq pen tynyshtyqty basty baılyǵy dep sanaıtyn eldiń Parlamenti qabyldaǵan Qazaqstan Respýblıkasynyń Tuńǵysh Prezıdenti – Elbasynyń «Beıbitshilik jáne progress syılyǵy» bar ekenin eske salyp, 2013 jylǵy sol syılyq ataqty aqyn, qoǵam qaıratkeri Oljas Súleımenovke tapsyrylatynyn aıtty. O.Súleımenov elimizdiń mádenı-rýhanı ómiriniń ósip-órkendeýine, halyqaralyq yntymaqtastyqty damytýǵa, Táýelsizdik jyldarynda halqymyz birliginiń nyǵaıýyna, Qazaqstandaǵy tatýlyq pen tynyshtyqty dúnıejúzine pash etýge súbeli úles qosyp kele jatqan aıtýly azamatymyz, deı kelip, ol qurǵan «Nevada-Semeı» qozǵalysynyń ıadrolyq synaq polıgonyn jabýǵa úlken kómek kórsetkenin de atap ótti.
Odan ári Prezıdent ǵylym men tehnıka salasynda beriletin Memlekettik syılyqtar tapsyrylatynyna da toqtaldy. Táýelsizdikti tuǵyrly etýge ǵalymdarymyzdyń qosqan úlesi de qomaqty, dedi osy oraıda Memleket basshysy. Sonyń ishinde syılyq halyqaralyq deńgeıdegi matematıkalyq problemalardy sheshýge usynǵan ǵylymı máni zor eńbegi úshin Tynysbek Kálmenovke, qazirgi medısına salasyndaǵy ozyq tehnologııalardy engizýge qol jetkizgen Serik Aqsholaqov basqaratyn «Respýblıkalyq neırohırýrgııa ǵylymı ortalyǵynyń» ujymyna, mańyzy zor ǵylymı qoldanbaly sala – kartografııalaý isindegi jemisti jumystary úshin osy salanyń bir top geograf-ǵalymdaryna beriletinin jetkizdi. El ıgiligi úshin ter tógip, izdenister arqyly zor jetistikterge jetken adamdar qashanda erekshe iltıpatqa laıyq. Sonyń dáleli – olardyń eldiń zor marapattaryna qol jetkizgendigi. Osylaı deı kelip, Elbasy laıyqtylardy nagradtady.
О́zine Tuńǵysh Prezıdenttiń «Beıbitshilik jáne progress syılyǵy» tapsyrylǵannan keıin aqyn Oljas Súleımenov Elbasyna ózine kórsetilgen qurmet úshin úlken alǵysyn aıtty. Men Prezıdenttiń osy syılyǵynda kórsetilgen jumystarymdy, Qudaı buıyrtsa, odan ári de jalǵastyramyn, dedi ol.
Aıta keterligi, «Respýblıkalyq neırohırýrgııa ǵylymı ortalyǵy» ujymynda Memlekettik syılyqqa ıe bolǵandar arasynda bólimshe meńgerýshileri Talǵat Kerimbaev, Erbol Mahambetov, Aısa Nurpeıisov, Marat Rabandııarov, Nurjan Ryskeldıev, Atlastyq kartografııalaý salasyndaǵy ǵylymı jumystar toptamasy úshin syılyq alǵandar qatarynda «Parasat» AQ geografııa ınstıtýtynyń dırektory Ahmetqalı Medeý, bas ǵylymı qyzmetker Farıda Akııanova, ǵylymı-metodıkalyq ortalyqtyń jetekshisi Álııa Beısenova, laboratorııa jetekshisi Vıktor Blagoveshenskıı, t.b. boldy.
Sonymen qatar, Elbasy N.Nazarbaev osy kúni ádebıet pen kórkemónerdiń bir top ókilderine «Qazaqstannyń eńbek sińirgen qaıratkeri» qurmetti ataǵyn berdi. Olardyń arasynda ánshiler Qaraqat Ábildına, Sembek Jumaǵalıev, ártister Nurlan Álimjanov, Venera Nyǵmatýlına, baletmeıster Álıla Álishova, jýrnalıst Erlan Bekhojın, jazýshy Smaǵul Elýbaev, aqyn Ulyqbek Esdáýlet, dızaıner Tımýr Súleımenov jáne t.b. boldy.
Marapattaý rásimi aıaqtalǵan soń Elbasy N.Nazarbaev olardy joǵary nagradalarymen quttyqtap, densaýlyq jáne shyǵarmashylyq jańa tabystar tiledi. Sonymen qatar, óziniń Jarlyǵymen Táýelsizdik kúni merekesine oraı 1500-den astam adamnyń marapattalǵanyn, olarǵa nagradalaryn Prezıdenttiń atynan jergilikti jerlerde ákimder men ortalyq organdardyń basshylary tapsyratynyn aıtty. Barshańyzdyń marapattaryńyz qutty bolsyn, dedi Elbasy sóziniń sońynda.
Jaqsybaı SAMRAT,
«Egemen Qazaqstan».
Sýretti túsirgender
S.BONDARENKO, B.OTARBAEV.