Memleket basshysyna óńirdiń 2020 jylǵy damý qorytyndylary men Prezıdent tapsyrmalarynyń oryndalý barysy, sondaı-aq, Qazaqstan halqyna arnalǵan Joldaýdaǵy mindetterdi júzege asyrý jospary jóninde baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Berdibek Saparbaev Qasym-Jomart Toqaevqa esep berilip otyrǵan kezeńdegi Jambyl oblysynyń ekonomıkasynyń ósimi 102,2 paıyzǵa, negizgi kapıtaldyń ınvestısııasy 344,1 mıllıard teńgege jetkeni jaıynda aıtty.
Kezdesý barysynda áleýmettik salany damytýǵa erekshe kóńil bólindi. Prezıdentke pandemııa kezinde oblystyń 524 myń turǵynyna 44,6 mıllıard teńge kóleminde qarjylaı áleýmettik kómek kórsetilgeni týraly aıtyldy. Sondaı-aq Táýelsizdik kúni men jańa jyl merekeleri qarsańynda 8 myń adamǵa 203 mıllıon teńge kóleminde qosymsha bir rettik kómek berilgen.
Sonymen qatar Qasym-Jomart Toqaevqa Qordaı aýdanyndaǵy ahýal jóninde baıandaldy. Oblys ákiminiń aıtýynsha, aýdandaǵy jaǵdaı turaqty. Byltyr turǵyn úı jáne jol qurylysy, bilim berý, medısına, mádenıet jáne sport salalary boıynsha jalpy quny 35,1 mıllıard teńge bolatyn 392 joba iske asyrylǵan. Memleket basshysynyń tapsyrmasy boıynsha 22 eldi mekenge gaz tartý, aýyzsýmen qamtamasyz etý jáne 391 shaqyrym jol salý jumystary júrgizilgen. 360 páterlik 5 turǵyn úı salynǵan.
Berdibek Saparbaev koronavırýstyń kelesi tolqynyna daıyndyq jóninde aıtty. Oblysta juqpaly aýrý juqtyrǵandar úshin 4,5 myń jáne jan saqtaý bólimderinde 468 tósek-oryn daıyndalǵan. Dári-dármektiń eki aılyq qory jasaqtalǵan. Qajet bolǵan jaǵdaıda qosymsha 7 myńǵa deıin medısına qyzmetkerleri jumysqa tartylady.
Qordaı aýdanynyń Gvardeısk aýylyndaǵy Bıologııalyq qaýipsizdik problemalary jónindegi ǵylymı-zertteý ınstıtýtynyń bazasynda otandyq ımmýndyq preparattar shyǵaratyn zaýyttyń qurylysy júrgizilip jatyr.
Berdibek Saparbaev Qasym-Jomart Toqaevqa óńirdegi apatty jaǵdaıda turǵan jáne úsh aýysymdy mektepterdiń máselesin sheshý, buqaralyq sportpen shuǵyldanatyn adamdardyń sanyn 35 paıyzǵa deıin jetkizý jospary týraly aqparat berdi.
Memleket basshysy óńirdiń áleýmettik-ekonomıkalyq damýy boıynsha oblys ákiminiń jumysyna oń baǵa berip, epıdemııalyq ahýaldy baqylaýda ustaýdy, ınvestısııa tartý jáne Jumyspen qamtý jol kartasyn tıimdi júzege asyrý jumystaryn jandandyrýdy tapsyrdy.