Bul týraly Kásipkerler palatasynyń dırektory Ǵalymbek Jaqsylyqov aıtty.
«Bastaý» jobasy ótken jyldan bastap onlaın ótkizilýde. Joba aıasynda 2020 jyly Qyzylorda oblysy boıynsha 2150 adamdy oqytý josparlanǵan bolatyn. Jyl sońynda 2181 azamat sertıfıkat aldy. Olardyń 1966-sy aıaqtaǵany týraly, 205-i qatysqany týraly qujatqa ıe boldy, - deıdi Palata basshysy.
Byltyr oqyǵan azamattardyń ishinde jalpy somasy 422,1 mln teńge bolatyn 746 qatysýshynyń jobasyna qarjy bólingen. Onyń 411,2 mln teńgeni quraıtyn 741 jobasy memlekettik grant esebinen qarjylandyrylsa, 10,9 mln teńgelik 5 joba memlekettik baǵdarlama sheńberinde jeńildetilgen nesıege qol jetkizgen.
Aıta ketý kerek, «Eńbek» memlekettik baǵdarlamasy aıasynda kásipkerlik negizderine oqytý boıynsha «Bastaý» jobasy 2017 jyldan bastap júzege asyrylýda. Kýrsqa qatysýshylar 21 kún ishinde óz biliktilikterin arttyrady jáne arnaıy bıznes-jattyqtyrýshylardan kásip ashý jáne júrgizýdiń qyr-syryn úırenedi.
О́tken jyly joba 10 maýsymda bastalyp, Qyzylorda qalasy men oblystyń 7 aýdanynda, sondaı-aq Baıqońyr qalasynda ótkizildi. Elde tótenshe jaǵdaı jarııalanýyna jáne karantındik sharalardyń engizilýine baılanysty oqytýdyń keıbir erekshelikteri boldy. Oqý karantıge oraı onlaın júrgizildi. Belgili bir daǵdylar men bilimge ıe bolyp, beıne sabaqtar tapsyrmalaryn sátti oryndaǵandar oqýdy erterek aıaqtady.
Kýrs 12 modýl boıynsha 50 tanymdyq beıne sabaqtan jáne óz betinshe oryndaýǵa arnalǵan 9 tapsyrmadan turady. Oqý prosesi aıaqtalǵan kezde tyńdaýshy qorytyndy testileýden ótedi. Tyńdaýshy múmkindiginshe kóp ball jınaýy kerek. Osydan keıin ǵana oǵan bıznes-jospar qurastyrýshysy ashylady. Bıznes-jospar úshin eń joǵary baǵa 30 ball. Kýrs boıynsha aıaqtaǵany týraly jáne qatysqanyn rastaıtyn sertıfıkat beriledi. Sertıfıkattyń sońǵy túri jeńildetilgen paıyzben nesıe alýǵa nemese memlekettik grantqa qatysýǵa quqyq bermeıdi. Aıaqtaǵany jaıly sertıfıkatty alý úshin qatysýshy 60 % (18 ball) jáne odan joǵary ball jınaýy qajet. Eger qatysýshy bıznes-jospardy tekserý nátıjeleri boıynsha shekti ball jınamasa, oǵan qatysqany týraly sertıfıkat tapsyrylady. Qatysýshynyń bıznes-jospardy portal arqyly qaıta tapsyrýǵa 2 múmkindigi bar.