Petropavldyqtar Novopavlovka aýylynyń mańynda birden úsh aıaldama pavılonynyń áınekteriniń synǵanyn baıqap, polısııaǵa habarlaǵan. Áınekterdi syndyrǵan buzaqylar týraly Polisia.kz baǵdarlamasynyń kezekti shyǵarylymynda aıtyldy.
Polıseıler qaskúnemderdi anyqtaý úshin bir apta boıy izdestirý sharalaryn júrgizdi. Olar taksı júrgizýshileri men oıyn-saýyq mekemeleriniń qyzmetkerlerinen jaýap aldy. Atalmysh aýdanda ornatylǵan barlyq kameralardy qarap shyqty.
Izdestirý sharalary barysynda tártip saqshylarynyń nazaryna demalys oryndarynyń birinde týǵan kúnin atap ótken jas jigitter ilikti. Alaıda, olardyń eshqaısysy istegenderin moıyndaýǵa asyqpady.
Jınalǵan dálelderdiń arqasynda jedel ýákilder ózderiniń boljamdaryn rastady. Mas jigitterdiń áınekti qalaı syndyryp jatqany tolyqtaı beınebaqylaý kamerasyna túsip qalǵany belgili boldy.
«Jedel-izdestirý sharalary barysynda Petropavl qalasynyń turǵyndary ustaldy. Olardyń ekeýi kolledj stýdenti jáne bireýi kámeletke tolmaǵan jasóspirim», – dedi polısııa qyzmetkerleri.
Petropavl qalasy ákimdiginiń ókilderi qıraǵan aıaldamalardyń qunyn tergeýshilerge usyndy. Bir pavılonnyń jalpy quny 440 myń teńgeden asady. Buzaqylyq faktisi Qazaqstan Respýblıkasy Qylmystyq kodeksiniń 293-baby boıynsha sotqa deıingi tergeýdiń biryńǵaı tizilimine engizildi. Kolledjdiń eki stýdenti men bir jasóspirimge qatysty “kelý týraly mindetteme” qabyldandy.