Jetisýda «Jaqynyńa janashyr bol» bastamasy aıasynda birqatar jaǵymdy is atqaryldy. Ásirese, ótken jyl sońynda muqtajdarǵa járdemdesý maqsatynda ár aýdan men qalanyń óz múmkindikterine qaraı kómir men otyn satyp áperý, azyq-túlik jaǵynan kómektesý, balalarǵa jańa jyldyq syılyqtar, kóp balaly jáne az qamtylǵan otbasy balalaryna qystyq kıimder, oqý quraldaryn syılaý, bir rettik qarjylaı qoldaý sııaqty birqatar qoldaý sharalary júzege asqan.
Mysaly, Qapshaǵaı qalasynda 1 600 otbasyǵa qajetti járdem berildi. Mundaı kómekti negizinen mesenattar men kásipkerler bıznestiń áleýmettik jaýapkershiligi aıasynda kórsetken. Onyń ishinde demeýshilerdiń qarjysyna 700 kóp balaly jáne az qamtylǵan otbasyna jalpy somasy 5 mln 325 myń teńgege azyq-túlik berilgen. Taǵy 55 otbasyǵa 1 mln 540 myń teńgege kómir túsirip bergen. Sol sııaqty kásipkerler múmkindigi shekteýli 700 balaǵa quny 2 mln 100 myń teńge bolatyn arnaıy syılyq úlestiripti. Al «Meıirimdi adamdar» qaıyrymdylyq sharasy sheńberinde taǵy 200 otbasyǵa quny 2 mln teńge bolatyn azyq-túlik paketteri taratylǵan. Jalpy Qapshaǵaı qalasy boıynsha byltyr 11 mln teńgege jýyq qaıyrymdylyq sharasy júzege asypty.
Bul ıgi dástúr Kóksý aýdanynda da jalǵasyp, muqtaj adamdarǵa 2 mln teńgeden astam somaǵa qaıyrymdylyq kómegi kórsetildi. Tıisti járdemge 72 otbasy qol jetkizgen. Bul rette óńir mesenattarynyń kórsetken qoldaýy zor. Onyń ishinde qaltaly azamattar birigip, Muqanshy aýylyndaǵy kóp balaly otbasyna 1 mln teńgege úı satyp ápergen eken. Munan bólek, aýdanda demeýshilerdiń qarjysyna 41 az qamtylǵan otbasyǵa jalpy somasy 500 myń teńgege azyq-túlik berilip, 40 otbasyǵa 550 myń teńgege otyn túsirilgen.
Al Uıǵyr aýdanyndaǵy «S.Abylaı» sharýa qojalyǵynyń jetekshisi Syrym Jomartuly Tasqarasý jáne Sharyn eldi mekenderiniń orta mektebi men aýrýhanasyna qajetti qural-jabdyqtar satyp alyp bergen. Bul tizimde 3 myń betperde, dıspenserlik jabdyq, termometr, zalalsyzdandyrý suıyqtyǵy men medısınalyq qolǵap sııaqty qajetti quraldar bar. Sonymen qatar turmysy tómen 25 otbasyǵa kómir túsirip beripti.
Jalpy, osy bastamaǵa boıynsha oblystyń barlyq óńiri belsene atsalysty. Al qaıyrymdylyq sharasyna bıýdjetten 46 mln teńge, demeýshilerdiń qarajatynan 272,4 mln teńge qarjy jumsaldy. Nátıjesinde, aımaqta 18 myńnan astam adamǵa naqty kómek kórsetildi.
Almaty oblysy