Qorǵanys mınıstrliginde 2020 jylǵa áskerı qyzmetke shaqyrýdyń qorytyndylary shyǵarylyp, aldaǵy áskerge shaqyrý kezeńine arnalǵan mindetter belgilendi.
COVID-19 pandemııasy shaqyrý naýqanynyń barysyna aıtarlyqtaı áser etkenine qaramastan, 2020 jyly 34 myńǵa jýyq azamat áskerı qyzmetke shaqyryldy. Bul týraly QR Qorǵanys mınıstriniń birinshi orynbasary – Qarýly Kúshter Bas shtabynyń bastyǵy general-leıtenant Murat Bektanovtyń basshylyǵymen ótken keńeıtilgen keńes barysynda aıtyldy. Beınekonferens baılanys rejımindegi is-sharaǵa ásker túrleriniń bas qolbasshylary, Qorǵanys mınıstrligi departamentteriniń bastyqtary, qurylymdyq bólimshelerdiń basshylary, basqa da áskerler men áskerı quralymdardyń ókilderi, ákimderdiń orynbasarlary, densaýlyq saqtaý basqarmalarynyń basshylary jáne oblystardyń, respýblıkalyq mańyzy bar qalalardyń qorǵanys isteri jónindegi departamentteriniń basshylary qatysty.
«Jalpy, ótken jylǵy shıelenisken qıyndyqtar men máseleler kezinde áskerlerdi shaqyrý men jasaqtaýǵa baılanysty barlyq mindetterdi sheshtik. Eń bastysy, biz bolashaqta tıimdi jumys isteýge múmkindik beretin belgili bir tájirıbe alyp, mashyqtandyq»,- dedi general-leıtenant Murat Bektanov.
Qorǵanys mınıstrliginiń Ortalyq áskerı-dárigerlik komıssııasynyń aqparaty boıynsha, medısınalyq kýálandyrý sapasy jaqsardy. Máselen, 2019 jyly áskerı qyzmetke qatysty emes 22 syrqat túri anyqtalǵan. О́tken jyly rastalǵany ekeý. Sonymen qatar, áskerge shaqyrylýshylardyń barlyǵy mindetti áleýmettik medısınalyq saqtandyrý júıesimen qamtylmaǵan, sondyqtan alǵashqy medısınalyq kýálandyrýdan keıin odan ári emdeý maqsatynda olarǵa qajetti medısınalyq qyzmetter árdaıym qoljetimdi bola bermeıdi. Bul úshin áskerı-dárigerlik komıssııa (ÁDK) mamandarynyń Densaýlyq saqtaý mınıstrliginiń aqparattyq júıelerine qoljetimdiligi qamtamasyz etiletin bolady.
Sondaı-aq, áskerge shaqyrý naýqany kezinde áskerge shaqyrylýshylardy ýaqtyly habardar etý máseleleri tolyq sheshilgen joq. Osyǵan baılanysty «elektrondy úkimettiń» derekter bazasymen ıntegrasııalaý boıynsha jumys júrgizilýde, bul áskerge shaqyrylýshylardy belgileýdi jeńildetedi jáne olardy SMS-habarlamalar arqyly ýaqtyly habardar etýdi qamtamasyz etedi.
Keńes qorytyndysy boıynsha jergilikti atqarýshy organdarynyń qorǵanys isteri jónindegi departamentterimen, basqa da áskerlermen jáne áskerı quralymdarmen is-áreketin úılestirýge, ýaqtyly jáne sapaly shaqyrtýdy qamtamasyz etýge baǵyttalǵan sheshimder qabyldandy.
QR Qorǵanys mınıstriniń birinshi orynbasary – Qarýly Kúshter Bas shtabynyń bastyǵy Murat Bektanov Qazaqstan áskeriniń bedelin arttyrýǵa jáne áskerı qyzmetke degen yntany arttyrýǵa yqpal etetin áskerge shaqyrýǵa deıingi jastardy áskerı-patrıottyq tárbıeleý jónindegi jumysty kúsheıtý qajettigine erekshe nazar aýdardy.