Jas urpaqtyń qııalyn ushtap, óz qoldarymen jańa nárse jasap shyǵarýǵa qulshynýy qýantady. Aqtaýdaǵy Nazarbaev zııatkerlik mektebiniń 10 «A» synyp oqýshysy Dıana Qýanbaı jylyjaı men kógal sýarýǵa arnalǵan mashına jasap shyǵardy.
Dıana bul jobamen 2019 jyly aınalysyp bastaǵan. Ázirge joba robot maket kúıinde daıyn tur.
– Jumys isteý prosesi ońaılatylǵan. Robot aldymen topyraqtyń ylǵaldylyǵyn ólshep, osyǵan sáıkes sý mólsherin anyqtap, jerdi sýarady. Ázirge bilim ordamyzdaǵy jylyjaıda synap júrmiz jáne robotty jetildirý ústindemiz. Osy jobamen oblystyq ǵylymı baıqaýlar jobasynda júldeli orynnan kórindik, endi respýblıka deńgeıindegi saıysta qorǵaımyn, – deıdi ónertapqysh.
Dıana qazirde biregeı jobasymen naýryz aıynda ótetin respýblıkalyq baıqaýǵa daıyndalýda. Robotqa qaýipsizdik GPS saýytyn ornatý josparlanyp otyr.
16 jastaǵy Dıana Qýanbaı bolashaqta IT salasynda joǵary bilim alý úshin Eýropadaǵy bedeldi ýnıversıtetke túsýdi oılaıdy. Otbasyndaǵy 4 balanyń úlkeni mektepti abyroıly támamdap, týǵan ólkeniń damýyna óz úlesin qosqysy keledi.
Mańǵystaý oblysy