Aqtóbe oblysynyń eńbek ınspeksııasy basqarmasynyń basshysy Salamat Amanbaev Hromtaý aýdanyndaǵy «Vesennıaıa Aralchınskaıa» shahtasyndaǵy 4 kenshiniń qazasyna baılanysty qurylǵan komıssııa tekserisiniń qorytyndysyn jarııalady.
Komıssııa músheleri «jazataıym oqıǵada jumys berýshiniń kinási – 80 paıyz, al jumysshylardyń kinási 20 paıyz» dep, biraýyzdan toqtamǵa kelgen. Aıta ketý kerek, 30 jeltoqsan kúni keshki 19.00 shamasynda «Aqtóbe mys kompanııasy» JShS-ǵa qarasty «Vesennıaıa Aralchınskaıa» shahtasynda bolǵan apattan tórt kenshi qaıtys boldy. Kóktaý eldi mekeninen 30 shaqyrym jerdegi shahtada jarylys jumystaryn júrgizgen taý-ken sheberi Ashat Qaıqanov, jarýshylar Denıs Chernyı, Rústem Shámetov pen kólik júrgizýshisi Berik Jaqypov baılanysqa shyqpaǵan soń, dereý kelip jetken qutqarýshylar olardy qutqaryp qala almaı, 1 500 metr tereńdiktegi shahtanyń túbinen Qanat Abdýllaevty ǵana aman alyp shyqqan.
Ýly gazdan tunshyǵyp qaza tapqan jumysshylardyń jastary 35-40 shamasynda, úsheýi – Hromtaý aýdanynyń, bireýi Qarǵaly aýdanynyń turǵyndary edi. Oblystyń bas eńbek ınspektorynyń habarlaýynsha, komıssııa músheleri oqıǵany tekserý barysynda Qanat Abdýllaevtyń aıtqandaryn basty negizge alǵan.
Aman qalǵan kenshiniń aıtýynsha, olar kendi jarýdy aıaqtap, joǵaryǵa kóterilmek bolyp kólikke mingende, shahtanyń ishin lezde tuman basqan. Oqıǵa sanaýly mınýt ishinde órbıdi. Aǵa sheber Ashat Qaıqanov jumysshylarmen birge kólikke otyryp, shahtadan tezirek shyǵýǵa asyǵady. Qanat olarǵa «Toqtańdar!» dep aıqaılap, dereý qutqarǵyshyn iske qosyp, shahtanyń túbinde qozǵalmaı otyra qalady. 30-40 mınýttan soń ornynan turyp, joldastaryna qaraı júgirgende, olardyń qaza bolǵanyn kóredi.
Komıssııanyń málimetine qaraǵanda, «Aǵa sheber shahtanyń tómengi qabatynda ýly gaz taraı bastaǵanyn dıspetcherge birden habarlamaı, ózderi shyǵýǵa árekettengen. Kendi jarý jumystarynan soń ýly gazdardyń taralý qaýpi óte joǵary bolǵandyqtan, shahta jeldetkishteri toqtaýsyz jumys istep turýy kerek. О́kinishke qaraı, sol kúni keshke jeldetkishter jumys istemegen». Qanat Abdýllaevty dárigerler qarap, ómirine esh qaýip joq dep úıine jibergen.
«Bul jerde ýly gazdy soryp alatyn shahta jeldetkishteri qaıda degen zańdy suraq týady. Dıspetcher Altynbekov ýly gazdy soryp alatyn jeldetkish bas ınjener Savınnyń buıryǵymen sol kúni 18.55-te toqtatylǵanyn habarlady. Biz jumysshylar kimniń kinásinen qaza tapty dep aldyn ala qorytyndy jasaýdan aýlaqpyz. Biraq sanaýly mınýt ishinde bolǵan oqıǵa osy. Qazir Hromtaý aýdandyq ishki ister bólimi eńbek qaýipsizdiginiń buzylýy men jazataıym oqıǵaǵa jol berilgendigi boıynsha qylmystyq is qozǵady».
Komıssııa músheleri osy kásiporynda eńbek qaýipsizdigi erejeleri óreskel buzylǵanyn alǵa tartady. Shahtanyń tereń qabattarynda ýly gazdyń deńgeıin anyqtaıtyn arnaıy qondyrǵylar boldy ma, joq pa? Bul saýalǵa eshkim jaýap bermegen. Kásiporyn jumysshylary ózderiniń qorǵanysh kıimderimen qamtamasyz etilmeıtinin de másele etip kóterdi. Eń bastysy – mys kompanııasyndaǵy kásipodaq uıymy óz eńbekkerleriniń quqyǵyn qorǵaı bermeıtini, tehnıka qaýipsizdigine jaýap beretin ınjenerlerdiń óz mindetterin tıisti deńgeıde oryndamaıtyny basy ashyq másele bolyp tur.
Qazir kompanııa qaıtys bolǵandardyń otbasylaryna saqtandyrý tólemderin berýdi bastady. Tórt otbasy asyraýshylarynan aıryldy, olardyń jas balalary ákesiz qaldy, qyrshynnan qıylǵan jigitterdiń áke-shesheleri qaıǵydan qan jutqandaı halde. Kompanııa basshylyǵy qaza tapqan kenshilerdiń balalaryna kámelet jasyna jetkenshe kómek berip, olardy turǵyn úımen qamtamasyz etýdi mindetine aldy.
Aqtóbe oblysy