Búgin, 16 jeltoqsan – Qazaqstan Respýblıkasy Táýelsizdigi kúni. Elimizdiń eń basty merekesi bolyp tabylatyn bul kúni respýblıkamyzdyń ortalyǵynan bastap, barlyq aımaqtarda keńinen toılanyp jatyr. Bizdiń oblystardaǵy tilshilerimiz osy merekelik sátterden habar beredi.
Erjan Baıtiles- Qyzylordadan:
Táýelsizdik – Táńirdiń móri. Jaratqannyń ózi jar bolyp Azattyqtyń aq tańyna jettik. Árbir qazaqstandyq úshin qadirli de qasterli merekeni Syr boıyndaǵy jurtshylyq erekshe qarsy aldy. Oǵan sebep te joq emes. О́ıtkeni, tirligimen eline eren eńbek sińirip júrgen Abzal Eralıev keshe ǵana Elbasynyń qolynan «Qazaqstannyń Eńbek Eri» ataǵyn aldy. «Egemenniń» oqyrmandary biledi. Biz Eralıev basqaratyn «Abzal jáne K» tolyq seriktestiginiń jumysy týraly udaıy aqparattandyryp otyrdyq. Jaqynda ǵana el gazetiniń betinde «Abzal adam» degen maqalanyń jaryq kórgenin oqýshy qaýym esterinen shyǵara qoımaǵan shyǵar. Aımaq basshysy Qyrymbek Kósherbaev bastaǵan qyzylordalyqtar «Eńbek Erin» áýejaıdan kútip aldy. Sonan soń Nartaı Bekejanov atyndaǵy oblystyq drama teatryndaǵy saltanatty sharaǵa deıin birge keldi. Merekelik sharaǵa kelgen halyq Abzal Eralıevti tabandarynan tik turyp, zor iltıpat bildirip qarsy aldy. Onan soń oblys ákimi Qyrymbek Eleýuly Syr halqyn merekelerimen quttyqtap, sóz sóıledi. Ákim Qazaqstannyń búgingi jetistikteriniń barlyǵy Táýelsizdik pen Elbasynyń syndarly saıasatynyń arqasynda júzege asyp jatqanyn basa aıtty. Sonymen qatar Ult kóshbasshysy udaıy nazarynda ustap otyratyn Qyzylorda oblysynyń damý dınamıkasy týraly sóz qozǵady.
«Táýelsiz Qazaqstannyń irgetasyn qalap, shekarasyn naqtylap, bolashaǵyna oń baǵyt-baǵdar bergen, búgingideı irgeli memleket qalyptastyrǵan Tuńǵysh Prezıdentimizdiń halyqqa, elge jasaǵan eńbegi ushan-teńiz. Osy jyldardaǵy ıgilikti isterdiń barlyǵy Elbasy esimimen tyǵyz baılanysty. Daraboz Kóshbasshynyń salıqaly saıasaty Qazaqstandy ózi ornalasqan aımaqtyń ǵana emes, búkilálemdik problemalardy talqylaýda jáne sheshýde yqpaldy ról atqaratyn áleýetti memleketke aınaldyrdy»,- dedi Qyrymbek Eleýuly.
Munan soń Abzal Eralıev sahna tórine kóterilip, jurtshylyqty aıtýly merekemen quttyqtady. Ol «Qazaqstannyń Eńbek Eri» ataǵy ózine ǵana berilgen qurmet emes, barsha qyzylordalyq eńbekkerlerge Elbasy tarapynan jasalǵan syı dedi. Budan keıin aımaq basshysy mereke qarsańynda «Shapaǵat», «Qurmet», «Qazaqstannyń eńbek sińirgen qaıratkeri», «Eren eńbegi úshin» sekildi memlekettik syılyqtarǵa ıe bolǵan azamattardy marapattady. Saltanatty shara sońy merekelik konsertpen jalǵasty.
Táýelsizdik kúni merekesi qarsańynda Qyzylorda oblysynda birneshe áleýmettik nysandar ashyldy. Máselen, Jalaǵash aýdanynda eki birdeı aýyldyq klýb el ıgiligine berildi. Al Syrdarııa aýdanynda «Aqbulaq» baǵdarlamasy boıynsha qaıta jańǵyrtýdan ótken aýyz sý júıesi iske qosyldy. Osylaısha, qyzylordalyqtar ataýly kúndi erekshe kóńil kúımen atap ótti.
Názıra Járimbetova - Qostanaıdan:
Táýelsizdik kúni merekesine baılanysty sharalar Qostanaıda tús kezinen bastaldy. Shyńyltyr aıazǵa qaramastan, oblys ortalyǵynda merekelik saýda qyzdy. Patrıottyq ánder ortalyqqa kelgenderdiń kóńilin odan saıyn kótere túskendeı. Ár qostanaılyqtyń júregin Qazaqstan úshin maqtanysh kerneıtindeı. Elimizdiń osy kúnge jetkenine shúkir etedi. Oblys óńiriniń ekonomıkasy damyp, áleýmettik sala kúsheıip keledi. Qostanaı-elimizdegi totydaı taranǵan qalanyń biri. Mereke aldynda ǵana biraz qostanaılyqtar ákim qolynan páter kiltin aldy. Qýanyshqa qýanysh qosyldy. Baspanaly bolǵan oblystyq fılarmonııanyń ártisi Dárkenbaı Sanaı merekeni qyzyqtaýǵa otbasymen qala ortalyǵyna shyǵypty. Dýman qyzyǵy aıazdyń shymshylaýyn eler emes.
«Táýelsizdiktiń bizdiń otbasyna bergeni ushan-teńiz. Meniń bala kezimde ákem ata jurtymyzǵa oralǵan edi. Qazaqstanda er jetip, mamandyq aldym. Mine, endi ózim baspanaly bolyp otyrmyn. Mereke barlyǵymyzǵa qutty bolsyn! Qasıetti kún ǵoı!»,deıdi Dárkenbaı qýanyshyn jasyra almaı.
Táýelsizdik kúni merekelik sharalar birinen soń biri jalǵasyn tapty. Qostanaı qalasynyń ortalyǵynda «Shahmat klýby» bar. Bul oryn osy qaladaǵy úlken-kishiniń jıi bas suǵatyn jeri. Biraq, kelýshiler qatary ádettegiden kóp boldy. О́ıtkeni, munda «Táýelsizdik-maqtanyshym meniń!» degen merekelik baǵdarlama ótkizilip, onyń mańyzy týraly jas urpaqtarǵa tarıhı derek aıtyldy. Táýelsizdik merekesi rasynda qasıetti kún. Bul bostandyqty ańsap, «eńký-eńký jer shalǵan» atalar armanynyń toıy. Aıazdy kúngi dýyldaǵan mereke osyny uǵyndyrdy...
Temir Qusaıyn - Oraldan:
Ǵasyrlar boıy ata-babalarymyz armandap ótken Táýelsizdik kıeli de qasıetti uǵym ǵana emes, sonymen birge eldiń eseıýi, alǵa qaraı damýy, ósip órkendeýi. Osyndaı oń baǵytpen kele jatqan elimizdiń batystaǵy bosaǵasy – Oral óńirinde Táýelsizdik kúni qarsańynda jańa turmystyq nysandar – mektepter men emhanalar, qyzmet kórsetý ortalyqtary men sport keshenderi paıdalanýǵa berildi. Sonyń biri Aqjaıyq aýdanynyń Saıqudyq aýylynda boı kótergen jańa mektep ǵımaraty. Oǵan aqyn, memlekettik syılyqtyń ıegeri Juban Moldaǵalıevtiń esimi berildi. Onyń ashylý rásimine Almatydan arnaıy kelgen birtýar sýretkerdiń jary Sofııa apaı óz tilegin bylaısha jetkizdi:«Jubaǵań Qazaqstannyń táýelsiz el bolýyn murat tutqan kúıinde ómirden ótip edi. Oǵan jete almasa da, keıingi urpaǵy táýelsizdiktiń jemisin kóre bastady. Men osyǵan qýanamyn».
Batys Qazaqstannyń baı tarıhy men shynaıy shejiresi bar sanaly ǵumyryn azattyqpen erkindik jolyna arnap ótken arystardyń az bolmaǵanyn kórsetedi. Aıtalyq, sonaý 1917 jyldyń ózinde Ordada «Uran» gazetin shyǵaryp, baspahana ashqan Ǵumar Qarash, Ǵabdolǵazız Musaǵalıev jáne Tamımdar Safıev sekildi Alash arystary osy tizimniń bel ortasynan oıyp turyp oryn alady. Táýelsizdik merekesi kúni qarsańynda jańǵyrtý jumystary júrgizilgen elimizdegi birden-bir osy tarıhı baspahananyń qaıtadan esik ashýy – ulttyq tarıhymyzdy qasterlegenimiz bolyp esepteledi.
Oral qalasyndaǵy táýelsizdik tańy týǵyzǵan nysandardyń biri egemendiktiń eleń- alańynda, dál sol 16 jeltoqsan kúni Muhtar Áýezovtiń «Qara kóz» tragedııasymen ashylyp, shymyldyǵy túrilgen – qazaq drama teatry. Osy kıeli jerde Batys Qazaqstan oblysynyń ákimi Nurlan Noǵaev Elbasynyń Jarlyǵy boıynsha táýelsizdikti nyǵaıtýǵa qosqan úlesteri úshin memlekettik nagradalarǵa ıe bolǵan bir top batysqazaqstandyqtardy marapattady.
Oralhan Dáýit - Shymkentten:
Táýelsizdik kúnin Ońtústik Qazaqstan jurtshylyǵy keńinen atap ótti. Bul kúni Shymkent qalasyndaǵy jańa ákimshilik-iskerlik ortalyǵynda boı kótergen kórme zalynda jurtshylyq merekege oraı uıymdastyrylǵan túrli kórinisterdi tamashalap, el tarıhynan syr shertetin qoıylymdarǵa kýá boldy. Saltanatty jıyn barysynda óńirdiń áleýmettik-ekonomıkalyq damýyna úles qosqan, aımaqty meken etken túrli ult pen ulystyń tatý-tátti kún keshýine eńbegin sińirgen jetpis adamǵa memlekettik syılyqtar tabys etildi.
Jalpy, osy Táýelsizdik kúni oblysta Indýstrııalandyrý kartasy aıasynda 2 joba iske qosyldy. Onyń biri, Shymkent qalasy «Otaý Stroı» JShS metall konstrýksııalaryn shyǵaratyn zaýyty. Jobanyń quny-543,6 mln. teńge. Josparlyq qýattylyǵy - jylyna 3000 tonna. Joba boıynsha 22 jańa jumys orny ashylǵan. Negizgi shyǵaratyn taýarlary balkalar jáne kolonnalar. О́ndiriste óńirde buryn-sońdy bolmaǵan zamanaýı tehnologııalyq jabdyqtar qoldanylýda. Táýelsizdik kúni qarsańynda ashylǵan ekinshi joba da Shymkent qalasynda iske asyrylýda. Ol «Altyn Tastaq» JShS-nyń gazsılıkatbeton shyǵaratyn zaýyty. Jobanyń quny 366,0 mln. teńge jáne 26 jańa jumys orny qurylǵan.Sondaı-aq, tarıhı mańyzy da, saıası máni de zor hám eldigimizdiń kepili bolǵan ulyq meıramda Shymkent qalasyndaǵy «Nursát» shaǵyn aýdanyndaǵy kópqabatty turǵyn úı paıdalanýǵa berilip otyr. Baspana kilti 29 jasqa deıingi jetim jáne ata-anasynyń qamqorlyǵynsyz qalǵan 32 otbasyǵa saltanatty túrde tabys etildi. Táýelsizdik kúni qala ortalyǵy men barlyq aýdan ortalyqtarynda merekelik baǵdarlamalar men sporttyq jarystar ótkizildi.Keshke qazaqstandyq óner juldyzdarynyń konserti uıymdastyrylyp, sońy otshashýǵa ulasady...
Aıqyn Nesipbaı - Qaraǵandydan:
Táýelsizdik merekesi kúni kenshilerdiń Mádenıet saraıynda ótken saltanatty jınalystan bastaý aldy. Oǵan qatysýshylar aldynda oblys ákimi Baýyrjan Ábdishev sóz sóılep, óńir jurtshylyǵyn el tarıhyndaǵy mereıli merekemen quttyqtady. Bir top eńbek ardagerlerine , mádenıet pen óner qaıratkerlerine memlekettik nagradalar tapsyryldy.
Búgin, qalamyzdyń barlyq jerlerinde merekelik shara joǵary deńgeıde atalyp ótti. Osyndaı ıgi isten «Bolashaq» ýnıversıtetiniń ujymy da qalys qalmady. Al Temirtaýdaǵy Tuńǵysh Prezıdenttiń tarıhı-mádenı ortalyǵynda elimizdiń táýelsizdik jyldarynda qol jetkizgen tabystary týraly derekter kelýshilerge keńinen aıtyldy. Jalpy, bir maqsat, bir tilek toǵystyrǵan qaraǵandylyqtardyń ortaq qýanyshy óz týǵan elderine degen maqtanyshtaryn pash etti.
Joldasbek Shópeǵul - Atyraýdan:
Munaıly Atyraýda el Táýelsizdiginiń 22 jyldyǵyna arnalǵan sharalar shoǵyry merekeden birneshe kún buryn bastaý alǵan edi. Sondaı sharalardyń qatarynda táýelsizdiktiń eleń-alań shaǵynda memlekettiń qalyptasýyna qaltqysyz qyzmet etip, búginderi jas urpaqty otanshyl rýhta tárbıeleýge úles qosyp júrgen aǵa býyn ókilderimen kezdesýler uıymdastyrylǵanyn aıtýǵa bolady. Sporttyń ár túrinen jarystar men týrnırler ótkizildi. Mundaı tárbıelik mańyzy zor sharalar óńir ortalyǵymen birge aýdandardy da qamtydy. Al búgin N.Jantórın atyndaǵy oblystyq fılarmonııada «Jyrym meniń, Otanym!» atty sazdy baǵdarlamanyń aıasynda kórkem ónerpazdardyń óneri jurtshylyqqa usynyldy. О́ńir ónerpazdary táýelsiz Qazaqstandy, týǵan el men týǵan jerdi súıýge, qadirleı bilýge úndegen áserli ánder men kúılerdi naqyshyna keltire oryndady.
Táýelsizdik kúnine arnalǵan merekelik sharaǵa etnomádenı birlestikter de belsene qatysty. Sonyń biri-«Iverııa» grýzın etnomádenı birlestigi uıymdastyrǵan konserttik baǵdarlama. О́ńirge tanymal kásipker Zýrab Bobohıdze jetekshilik etetin bul birlestik janynan 8-9 ulttyń ókilderi qatysatyn bı ansambli qurylǵan. Sol ansambl búgin «Qurmanǵazy» mádenıet saraıynda ár ulttyń bıin bıledi. Konserttik baǵdarlamada ár ulttyń tilinde ánder de shyrqaldy.Sonymen birge, bul kúngi mádenı sharalar «Jastar» mádenıet úıinde «Táýelsizdik –elimniń erlik joly» atty konsertpen jalǵasyn tapty.
Gúlaıym Shyntemirqyzy Aqtaýdan:
Mańǵystaýda táýelsizdik meıramyna arnalǵan sharalar jeltoqsan aıynyń alǵashqy onkúndigi aıaqtala bere bastaý aldy. Ishki ister salasy qyzmetkerlerine páter jáne qyzmettik kólikter tabystalyp, mektep pen balabaqsha basty orynda turǵan Munaıly aýdanyndaǵy Atameken aýylynan 200 oryndyq balabaqsha ashyldy. Jeke kásipker B.Aqtórıev «Balapan» jáne «Jumyspen qamtý-2020» baǵdarlamalary aıasynda «Rahat» balalar baqshasyn iske qosty. Munaıly aýdanynyń ákimi E.Ábilovtiń aıtýynsha, aýdanda 2085 balany qamtyp otyrǵan 19 balalar baqshasy bar bolsa, «Rahat» 9-shy jekemenshik baqsha eken.
Shara aıasynda qala ortalyǵyndaǵy «Yntymaq» alańynda QR UQK shekara áskerleriniń jas sarbazdary áskerı ant qabyldady. Kúzgi shaqyrylymda atalmysh áskerı quram respýblıka boıynsha 2 myńnan astam jas sarbazben tolyqqan, sonyń 362-i shekaramyzdy Kaspıı teńizi arqyly qorǵaýǵa bekindi. Olar endi eki aıǵa jýyq ýaqyt katerler men kemelerdi basqarýdy úırenedi.
Merekege oraı uıymdastyrylǵan alýan sharalar arasynda «Táýelsizdik táý eter jalǵyz kıeń» atty jas dombyrashylar baıqaýy ótti. Talantty 11 jas qatysqan baıqaýda úmitkerler dástúrli án jáne kúı oryndaýdan saıysqa tústi. Sondaı-aq, «Qazaq eli osyndaı» patrıottyq ánder baıqaýy, «Táýelsizdik jolynda» sýret kórmesi, túrli sporttyq saıystar ótti.
Aımaqtyń ardagerleri men ár sala ókilderi jıylǵan saltanatty jıynda óz eńbeginiń úzdikterine memlekettik nagradalar tapsyrylyp, sońy konsertke ulasty.
Satybaldy Sáýirbaı - Aqtóbeden:
Qazaqstan Respýblıkasynyń táýelsizdigi merekesi qarsańynda Aqtóbe qalasy burynǵydan góri de jasaryp, jaınap ketti. Kóshelerge ilingen qyzyldy – jasyldy jalaýshalar men bılbordtar eldigimizdiń eńsesin kóterip, erteńimizdiń jarqyn bolatynyn aıǵaqtaı túskendeı boldy. T. Ahtanov atyndaǵy oblystyq drama teatrynda ótken el táýelsizdiginiń 22 jyldyǵyna arnalǵan saltanatty jıynǵa jurtshylyq, soǵys jáne eńbek ardagerleri, etno- mádenı, dinı, úkimettik emes uıymdar, memlekettik mekemeler ókilderi qatysty. Saltanaty jıynda baıandama jasaǵan oblys ákiminiń birinshi orynbasary Nurmuhambet Ábdibekov óńirdegi ekonomıkalyq jáne áleýmetttik damýǵa keńirek toqtala kelip, ústimizdegi jyldyń ótken kezeńinde ónerkásip ónimderin óndirý kólemi 1227 mlrd. teńge quraǵanyn jetkizdi. Oblystyń údemeli ındýstrııalyq –ınnovasııalyq damý baǵdarlamasyn júzege asyrýda óńirler arasynda kósh bastaýshylardyń qatarynda kele jatqanyn tilge tıek etti.
Saltanatty jıynda oblys ákimi Arhımed Muhambetov elimizdiń áleýmettik -ekonomıkalyq jáne mádenı damýyna eleýli úles qosyp kele jatqan bir top aqtóbelikterge úkimettik nagradalar tapsyrdy. «Parasat» ordenimen Yrǵyz aýdanynyń «Altyn –Ásel» JShS dırektory Hamıt О́teýuly, «Qazhrom» TUK» AQ» prezıdenti Vıktor Tıl marapattaldy. Bir top aqtóbelikter «Qurmet» ordenine, «Eren eńbegi úshin»jáne «Shapaǵat» medalderine ıe boldy. On bir adam «Oblystyń 2013 jyl adamy» ataǵyna ıe boldy, memlekettik tildiń qoldaný aıasyn keńeıtý jáne qazaqstandyq rýhanı birlikti qurýǵa qosqan úlesi úshin bir adam pátermen, úsh adam avtokólikpen, jeti adam aqshalaı syılyqpen marapattaldy. Marapattalǵandardyń arasynda belgili aqyn Ertaı Ashyqbaev avtokólik mindi. Saltanatty jıyn aqtóbelik óner sheberleriniń konsertine ulasty. Án aıtyldy, bı bılendi, dombyra shanaǵynan kúmbirlegen kúı tógildi.
Táýelsizdik merekesi aıasyndaǵy mádenı -kópshilik sharalar qalaǵa qarasty Sazdy aýylyndaǵy Mádenıet úıinde «Táýelsizdik tańy» atty teatrlandyrylǵan qoıylymmen, Ǵ.Jubanova atyndaǵy oblystyq fılarmonııadaǵy «Esińde me, sol bir kez» retro -konsertimen jalǵasty. «MegaAqtóbe» saýda ortalyǵyndaǵy kórkem-sýret kórmesin tamashalaýshylar qatary da mol boldy. Al «Dostyq» úıinde táýelsizdik kúnine arnalyp ótkizilgen etnomádenı birlestikter arasyndaǵy qazaq mádenıetiniń festıvali men merekelik bı keshi saltanatqa kelýshilerge kóterińki kóńil-kúı syılady. Merekelik sharalar aıasynda sporttyq jarystar, túrli baıqaýlar uıymdastyryldy. Mereke aýdandarda jáne eldi mekenderde jalǵasyn tapty. Qystyń qataıa túskenine qaramastan, aqtóbelikter Táýelsizdik kúnin uıymshyldyqpen atap ótti.
Farıda Byqaı - Pavlodardan:
Táýelsizdik kúni qarsańynda alystaǵy Jelezın aýdanynyń ortalyǵynda sport mektebi, Arqar aýylynda naýbaıhana, respýblıkalyq mańyzy bar tas joldyń boıyndaǵy Bashmaq aýylynda qonaqúı paıdalanýǵa berildi. Buǵan qosa, Pavlodar aýdanyndaǵy 6 aýyl mektebine kólik kiltteri tabys etildi. Oblys ortalyǵyndaǵy «Avtomobılıst» sport kesheninde múmkindigi shekteýli jandar arasynda paýerlıftıngten jarys ótti. Qalaǵa qarasty Qazanǵap bı aýylynda 300 oryndyq jańa mádenıet úıi ashyldy.
Búgin Táýelsizdik kúnine arnalǵan sharalar qalamyzdyń basty jerlerinde atalyp ótti. Jalpy, ortalyq alańda bolǵan jıynda mereıli merekeniń mańyzy, Qazaqstannyń qol jetkizgen tabysy, aldaǵy mindetteri týraly keńinen aıtyldy. Odan ári «Jeltoqsan oqıǵasyna qatysýshylary men qurbandaryna» arnalǵan memorıaldyq taqta basyna baryp, asyl azamattarǵa táý ettik...
Ońdasyn Elýbaı - О́skemennen:.
Táýelsizdik kúni Respýblıka alańy qala turǵyndaryna lyq toldy. Sazdy áýen aspanda qalyqtap tur. Merekege baılanysty qala basshylary jármeńke de uıymdastyrǵan eken. Et, sút, balyq taǵamdary arzan baǵamen saýdalandy. Saǵat 11-de oblys ákimi sahna tórine shyǵyp, óńir jurtshylyǵyn elimizdiń Táýelsizdik merekesimen quttyqtady.
Táýelsizdik dańǵylynda túrli sport jarystary bolyp ótti. Qalanyń birqatar aýdandarynda da Táýelsizdik merekesi este qalarlyqtaı mándi de sándi ótti.
Budan bir kún buryn óńir basshysy 50 adamǵa Elbasynyń atynan memlekettik marapattardy tapsyrǵan edi. Osy merekelik shara aıasynda ataqty shańǵyshy A.Poltoranın men onyń jattyqtyrýshysy A.Nakonechnyıǵa aqshalaı syılyq berilgenin atap ótkimiz keledi. Sondaı-aq, dańqty balýan Dáýlet Turlyhanov pen Olga Shıshıgına Shyǵys Qazaqstan oblysynyń qurmetti azamaty atandy.
Kósemáli Sáttibaıuly - Tarazdan:
Táýelsizdik kúni merekesine oraı «Balasaǵun» konsert zalynda ótken saltanatty jıyn jambyldyqtardy beıjaı qaldyrǵan joq. Bolashaqqa «Bir el – bir halyq – bir taǵdyr» ustanymy aıasynda umtylǵan óńir turǵyndarynyń mereke qarsańynda qol jetken tabystary da az emes.
Oblystyń jalpy aımaqtyq ónimi sońǵy 3 jylda 33 paıyzǵa ósip, 764 mlrd. teńgeni quraǵan. Al ústimizdegi jyldyń 10 aıynda negizgi kapıtalǵa quıylǵan ınvestısııanyń kólemi 154,2 mlrd. teńgege jetip, ótken jyldyń osy kezeńimen salystyrǵanda 50 paıyzǵa artqan. Árıne, bul tolaıym tabysqa árbir jambyldyqtyń óz úlesin qosqany anyq. Oblys ákiminiń baıandamasynan keıin óńir ónerpazdary sahnaǵa shyǵyp, mereke qýanyshyn bólisýge jınalǵandardy áýelegen ásem án men kúmbirlegen tátti kúıge tánti etti.
Mereke kúnderi oblys ortalyǵyndaǵy «Dostyq» alańyna jınalǵan kópshilik te táýelsizdiktiń sánin, beıbitshiliktiń mánin shyn uǵyna bildi. Kúnniń kúrt sýytyp, qardyń qylaýlaǵanyna qaramastan olar el táýelsizdigine arnalǵan konsertke qulaq túrip, túngi aspandy nurǵa bólegen otshashý órnekterin qyzyǵa tamashalady.
О́mir Esqalı - Petropavldan:
Qazaqstan Respýblıkasynyń Táýelsizdik kúnin merekeleý oblys ortalyǵyndaǵy bas alańnan bastalyp, shyn mánindegi tatýlyq pen kelisim is-sharasyna aınaldy. Júzderinen qýanysh tógilgen, jylylyq esken qala turǵyndaryna «Táýelsizdik tolǵaýy» atty merekelik konsert usynyldy. Onda túrli ult ókilderi tamyljyta án shyrqap, myń burala bı bılep, aınalany en shattyqqa bóledi. Qazaqstan Konstıtýsııasy, M.Jumabaev kóshelerinde aýyl sharýashylyq jármeńkesi, qolóner kórmeleri, «Elektronıka» dúkeninde jeńildikter men syılyqtar aksııasy uıymdastyrylyp, áleýmettik mańyzdy nysandardyń iske qosylýy merekelik is-sharanyń salmaǵyn arttyra tústi. Kúrdeli jóndeýden ótken eki balalar baqshasy kishkentaı balǵyndarǵa esikterin aıqara ashty. «Qoljetimdi turǵyn úı» baǵdarlamasy aıasynda 55 páterli ıpotekalyq turǵyn úı boı kóterse, «Bereke» shaǵyn aýdanynda «Jas otbasy» baǵdarlamasy sheńberinde 75 páterli turǵyn úı qoldanysqa berildi. «Sevkazenergosbyt» JShS-ine qarasty qyzmet kórsetý ortalyǵy, № 2 Petropavl jylý elektr ortalyǵynda № 4 týrbogenerator paıdalanýǵa berildi. Onyń qaıta jabdyqtalýyna 5,7 mlrd.teńge jumsaldy. Sporttyq sharalarǵa qatysýshylar men qyzyqtaýshylar da mol boldy. «Qyzyljar sý» AQ-nyń keń zalynda ardagerler arasynda voleıboldan týrnır ótse, «Delfın» basseıninde balalar júzýden ózara synǵa tústi.
Elimiz úshin ulyq mereke sanalatyn Táýelsizdik kúni aýdandarda da keńinen atalyp,soltústikqazaqstandyqtardyń tyǵyz toptasqandyǵynyń, saıası zor belsendiliginiń aıshyqty úlgisin pash etti.
Nurbol Áldibaev -Taldyqorǵannan:
Taldyqorǵandaǵy I. Jansúgirov atyndaǵy mádenıet saraıynda halqymyzdyń qasıetti merekesi - el Táýelsizdiginiń 22 jyldyǵyna oraı saltanatty jıyn ótkizildi. Onda Almaty oblysynyń ákimi Ańsar Musahanov sóz sóıledi: «Álemdik órkenıet kóshinde ózindik orny, maqsat tutar mádenıeti, laıyqty salt-dástúri bar halqymyz ult bolyp uıyǵaly beri tap búgingideı birtutas, qýatty memleket quryp, óz taǵdyryn ózi sheshýge múmkindigi bolǵan emes. Elimiz osy aralyqta talaı qaýip-qaterden aman ótip, etek-jeńin jıyp, eńsesin tikteı aldy. Búginde tirligi jarasqan, birligi baq ashqan elimizdiń armany oryndalyp, tolaıym tabystarǵa jetkendigimiz – qazaq halqynyń dara tulǵasy, perzenti, Ult Kóshbasshysy - Nursultan Ábishuly Nazarbaevtyń esimimen, salıqaly saıasatymen tyǵyz baılanysty. Osy baǵyttyń durys ekendigin búginde ómirdiń ózi dáleldep otyr. Táýelsizdik – bul eń aldymen eldiń ekonomıkalyq damýyn, áleýmettik mańyzdylyǵyn, mádenı órkendeýin aıqyndady. Aýyzbirshilik pen yntymaqtyń arqasynda kóp ultty memleketimizde Elbasy aıqyndaǵan «Qazaqstan- 2050» strategııasy júıeli túrde iske asyryla bastady. Respýblıkamyzdyń osyndaı bıikterdi baǵyndyrýyna Jetisý jurtshylyǵy da súbeli úlesin qosyp, tabysy zor, yrysy mol aımaqqa aınalyp keledi»,-dedi ol.
Oblys ákimi aıtsa aıtqandaı, sońǵy 5 jylda óńirlik jalpy ónim úsh esege artyp, 550,0 mlrd. teńgeden 1 trln. 459 mlrd. teńgege jetti. О́nerkásip kólemi 1,7 esege ósip, 516,3 mlrd. teńgeni qurady. Sondaı-aq, údemeli ındýstrııalyq - ınnovasııalyq damý baǵdarlamasy aıasynda ındýstrııalandyrý kartasyna quny 331,6 mlrd. teńgeni quraıtyn 49 joba endi. Búginde 238 mlrd. teńgelik 39joba júzege asyrylyp , 5 400 jumys orny quryldy. Munan ózge de birqatar óreli ister atqaryldy.
Jalpy, jıyn barysynda aldaǵy mindetter de keńinen atalyp, táýelsiz elimizdiń órkendeýine ózindik úles qosqan eńbekkerlerge nagradalar tabys etildi.
Qanat Eskendir - Almatydan:
Almatylyqtar Táýelsizdik kúnin Ortalyq alańdaǵy Táýelsizdik monýmentine azattyq kúresi jolyndaǵy qurbandardyń rýhyna taǵzym etip, gúl shoqtaryn qoıý rásiminen bastady.
Osy shara barysynda qala ákiminiń orynbasary Záýresh Amanjolova jergilikti turǵyndarǵa ıgi lebizin jetkizdi: «Táýelsizdik kúni – memleketimizdiń eń tuǵyrly da úlken merekesi. Sebebi, ata-babalarymyz ańsaǵan arman aqıqatqa aınaldy. Sondyqtan biz ony qasterleı bilýimiz tıis».
Merekeniń resmı bóliminen soń ortalyq alańda óner juldyzdarynyń konserti uıymdastyrylyp, qalanyń barlyq aýdandarynda merekelik jármeńkeler ótkizildi.
Baqbergen Amalbek - Kókshetaýdan:
Qazaqstan Táýelsizdiginiń 22 jyldyǵyna tolaǵaı tabystarmen kelgen Aqmola oblysynyń jurtshylyǵy merekelik sharany joǵary deńgeıde atap ótti. Osy kúni áleýmettik-ekonomıkalyq baǵyttaǵy 22 jańa nysan saltanatty túrde ashylyp, el ıgiligine berildi.
Mereke kezinde «Elbasy joly» fılmin myńdaǵan adamnyń tamashalaǵanyn atap ótkimiz keledi. Sondaı-aq, dál osy tusta, jýyrda ǵana halyqaralyq mártebe alǵan Kókshetaý áýejaıyna Máskeýden alǵashqy halyqaralyq reıs «Boıng» ushaǵy kelip qondy.
Jergilikti óńirdegi mádenıet saraıynda oblys ákimi Qosman Aıtmuhametov eńbek ozattary men óner sańlaqtaryn marapattady. Olardyń qatarynda «Qazaqstannyń Eńbek Eri» ataǵyn Memleket basshysy qolynan alǵan «Rodına» agrofırmasynyń dırektory Ivan Saýer de bar. Sonymen birge, birneshe azamatqa medaldar men nagradalar berildi.