Eldiń ystyq yqylasyna bólengen tanymal aıtys aqyndarynyń qatarynda atyraýlyq Salaýat Isahaev ta bar edi. Alaıda sum ajal onyń ómirin qıyp ketti. Endi onyń aıtystaǵy jolyn uly Ernur jalǵastyrǵaly otyr. Jaqynda ol «Habar» agenttigi uıymdastyrǵan «Aitystar» telejobasynyń jeńimpazy atandy.
Qazir 16 jastaǵy Ernur Isahaev Jylyoı aýdanyndaǵy Shoqpartoǵaı aýylynda turady. Osyndaǵy №3 orta mekteptiń 10-synybynda oqıdy.
– Bul jobaǵa kelmeı qalǵan aqyndardyń ornyna qatysý úshin aıtysker Balǵynbek Imashev shaqyryp edi. «Baǵyńdy synap kór» dep usynys aıtty. Osydan eki jyl buryn ákemdi eske alýǵa arnalǵan aıtysqa qatysqan edim. Al mundaı múmkindik keıin qaıtalanbaıtyn shyǵar. Sol sebepten, jobaǵa qatysýdan bas tartpadym, – deıdi Ernur Isahaev.
Onyń aıtýynsha, ákesi Salaýat kózi tirisinde ulyn aıtysqa shyǵarmaǵan eken. Bálkim, qanaty qataıa tússin degen bolar. Sóz óneriniń qadirin uǵyndyryp, sheberligin shyńdar tálim bergisi kelgen shyǵar. Degenmen, aıtysker ákesiniń jolyn jalǵastyrǵysy kelgen jas órenniń talabyna Balǵynbek Imashev qoldaý bildirdi. Sóıtip, óziniń dombyrasyn syıǵa tartty.
– Aqtyq syndaǵy basty erekshelik – aıtyskerlerdiń shoý-bıznes juldyzdarymen juptasa óner kórsetýi. Meniń jubym – ánshi Erdos Qanaev. Kóp jyl aýdandyq, oblystyq baıqaýlarǵa qatysyp kelemin. Endi mine, respýblıkalyq telejobada bas júldege ıe boldym. Mektep bitirgen soń Qazaq ulttyq óner ýnıversıtetinde akterlik, shyǵarmashylyq baǵytta joǵary bilim alǵym keledi. Ádebıet, tarıh, matematıka pánderine erekshe qyzyǵamyn, – deıdi Ernur Isahaev.
Atyraý oblysy