Búgingi tańda koronavırýs ınfeksııasynan keıin densaýlyqty qalpyna keltirý jáne osy aýrýdyń aldyn alý búkil álemde burynǵydan da ózekti bolyp tur. О́z kezeginde, mundaı suranys sanatorııalyq-kýrorttyq demalys pen medısınalyq týrızmdi damytýǵa múmkindik beredi.
Qazaqstan óziniń biregeı rekreasııalyq resýrstarymen post-kovıd ońaltý maqsatynda sanatorııalyq-kýrorttyq demalysty uıymdastyrý boıynsha TMD kóshbasshysy bola alady. Qolaıly klımattyq jaǵdaılar, mıneraldy sý kózderiniń jáne shıpa balshyq ken oryndarynyń bolýy Qazaqstannyń barlyq óńirlerinde emdeý-saýyqtyrý aımaqtarynyń damýyna yqpal etedi.
Koronovırýstan keıingi ońaltýdyń suranysy artyp jatqanyna baılanysty Qazaqstannyń Ulttyq Kýrorttyq qaýymdastyǵy sanatorııalyq-kýrorttyq obektilerdi zertteý qorytyndysyn shyǵaryp, COVID-19-ǵa shaldyqqan adamdardy ońaltý boıynsha baǵdarlamalary bar 10 úzdik sanatorıı anyqtady. Máselen, «Saryaǵash» kýrorttyq aımaǵyndaǵy sanatorıılerdiń ishindegi koronavırýstan keıingi ońaltý baǵdarlamalaryn usynatyn eń úzdigi jáne tıimdisi – «Altynaı» jáne «Qazaqstan KZ» ekeni belgili boldy. Sondaı-aq bul tizimge Túrkistan oblysyndaǵy «Mankent» shıpajaıy da kirdi.
Jambyl oblysynda Merke Radon sanatorııi jáne Jambyl oblysy ákimdiginiń densaýlyq saqtaý ShJQ «Aısha-bıbi» MKK sanatorııiniń ońaltý ortalyǵy ataldy. Budan basqa, Ulttyq Kýrorttyq qaýymdastyqpen koronovırýstan keıingi ońaltý baǵdarlamalary bar mynadaı sanatorııalyq-kýrorttyq obektiler atalǵyn: Almatyda – «Qazaqstan» sanatorııi jáne Altyn Kargaly qonaq úı-sanatorııi; Almatydan úsh shaqyrym jerde, Ile Alataýynyń etegindegi – Almaty Resort sanatorııi; Aqmola oblysynda – «Oqjetpes» emdeý saýyqtyrý kesheni; Batys Qazaqstan oblysynda – Nurbergen Health Resort sanatorııi jáne Aqtóbe oblysynda – «Shıpager» sanatorıı – profılaktorıi.
Esterińizge sala keteıik, Kazakh Tourism ulttyq kompanııasy Qazaqstannyń Ulttyq Kýrorttyq qaýymdastyǵymen birlese kýrorttyq aımaqtardyń aınalasyndaǵy ınfraqurylymnyń bar-joǵyn jáne materıaldyq-tehnıkalyq jaraqtandyrylýyn zerdeleı otyryp, sanatorııalyq-kýrorttyq obektilerge zertteý júrgizdi. Onda 173 sanatorııalyq-kýrorttyq obektige ınspeksııa júrgizilip, nátıjesinde jańartylǵan tizilim, sanatorııler katalogy usynyldy. www.kazakhstan.travel portalynda jumys istep turǵan sanatorııler týraly ózekti aqparat ornalastyryldy, sondaı-aq beınerolık shyǵaryldy.