Daýylpaz aqyn Qasym Amanjolovtyń týǵanyna 110 jyl tolýyna oraı «Abaı-TV» telearnasynyń tapsyrysy boıynsha derekti-pýblısıstıkalyq fılm túsirildi, dep habarlaıdy Egemen.kz oblys ákiminiń baspasóz qyzmetine silteme jasap.
Rejısser Ádil Nurtaı túsirgen 45 mınýttyq teletýyndy Qasym aqynnyń kúrdeli ómirinen syr shertedi. Fılmde aqynnyń jas kezindegi rólin jergilikti «Saryarqa» telearnasynyń tilshisi Erik Naryn somdady.
Qaraǵandylyq telejýrnalıst Qasym týǵan Qarqaraly aýdanynda dúnıege kelgen. «Jastaıymnan poezııaǵa qumar bolyp óstim. О́zim de óleń jazamyn. Sondyqtan aqynnyń rólin oınaý maǵan sonshalyqty qıyndyq týǵyzbady. Qaıta men ony úlken yntamen oınap shyqtym», deıdi Erik Naryn.
Qasym týraly derekti-pýblısıstıkalyq fılmniń tolyq nusqasyn «Abaı-TV» YouTube-arnasyndaǵy «Dáýir danalary» habarlar sıklinen kórýge bolady.
Qaraǵandy oblysy