Baıybyna barmaı jatyp, ekpe saldyrmaımyn dep baıbalam salyp jatqandar jeterlik. Jalpy alǵanda, qazaqstandyqtardyń 56 paıyzy ekpe saldyrýǵa qarsy emes. BISAM Central Asia áleýmettik jáne marketıngtik zertteý ortalyǵy júrgizgen saýaldamanyń nátıjesi osyndaı. Al qalǵan paıyzy bul suraqqa jaýap berýge qınalǵan.
Sondaı-aq Gallup International qaýymdastyǵy suraq-jaýap júrgizgen 47 elde respondentterdiń 67 paıyzy eger vaksına sapaly ári tıimdi bolsa, ekpe egýge daıyn ekenin aıtypty. Al 26 paıyzy qarsy, 7 paıyzy jaýap bermegen.
Dúnıejúzilik densaýlyq saqtaý uıymynyń maqsaty – osy dertti túbegeıli joıý. Álem boıynsha 42 memleket koronavırýsqa qarsy vaksınany qabyldaýǵa sheshim qabyldap otyr. Al TMD memleketteri arasynda ázirge Reseı men Belarýs sheshim qabyldady. Bul sharaǵa Qazaqstan bıyl aqpan aıynan bastap qosylady. DDU málimetine súıensek, osy ýaqytqa deıin dúnıe júzi boıynsha 95 mln 612 myń adam aýyrǵan, onyń ishinde 2 mln-nan astamy ólim-jitim jaǵdaıymen aıaqtalǵan. Vaksına egýdiń eń basty maqsaty – ólim-jitim jaǵdaıyna jetkizbeý, aýrýdyń aldyn alý.
Ekpe 18 jastan asqan adamdarǵa arnalǵan. Zańǵa sáıkes, vaksınadan kez kelgen azamattyń bas tartýǵa quqyǵy bar. Ekpe aldynda dáriger pasıentti mindetti túrde tekseredi. Qandaı da bir aýrý túrleri baıqalsa, saýyqqanǵa deıin shegeriledi. Sondaı-aq ár adam vaksınanyń quramy men óndirýshisi týraly aqparatpen tanysýǵa quqyly. Qazir turǵyndarǵa ekpe salýdyń elektrondy pasporty ázirlengen. Derekter Densaýlyq saqtaý mınıstrliginiń aqparattyq júıesinde elektrondy formatta júrgiziledi. Osy arqyly ekpe alǵan adam talap etiletin orynǵa aqparat usyna alady. Aımaqtardaǵy ahýaldy retteý men turaqtandyrý sharalary jalǵasyn tabady.
Kollajdy jasaǵan Qonysbaı ShEJIMBAI, «EQ»
«Jyl sońyna deıin 6 mln adamǵa ekpe salýdy josparlap otyrmyz. Vaksınanyń sapaly bolýyn qamtamasyz etý erekshe baqylaýda bolady. О́ndirýshiden medısınalyq mekemege deıin jetkizip berýdi bekitilgen adamdar baqylaýda ustaıdy. Onyń ózi 4 kezeńnen turady», dedi Densaýlyq saqtaý mınıstri Alekseı Soı.
Vedomstvo basshysy boljamdarymen de bólisti. Aıtýynsha, naýryzdyń sońynda indetti juqtyrýshylar kóp tirkelýi múmkin. Máselen, táýligine 3 myńdaı naýqas tirkelse, emhanalarda 24 myń tósektik oryn qajet bolady.
Mundaı jaǵdaıda qatań karantındik sharalardy engizý josparda joq. Al vırýs juqtyrǵandar sany 6-dan 9-myńǵa deıin jetse, 45 myń tósektik oryn qajet bolady. Bul jaǵdaıda qatań karantındik sharalar engiziledi. Biraq 2 mln adamǵa ekpe salý arqyly indet juqtyrýshylar sany 40 myńǵa azaıa dy degen úmit bar.
Densaýlyq saqtaý mınıstrligi Sanıtarııalyq-epıdemıologııalyq baqylaý komıteti Vaksınamen basqarylatyn ınfeksııalardy baqylaý basqarmasynyń basshysy Nýrshaı Iýsýntaıqyzy bizdiń elimizde qandaı vaksınalar ázirlenip jatqanyn jetkizdi.
«Dúnıejúzilik densaýlyq saqtaý uıymy tirkegen koronavırýs ınfeksııasyna qarsy vaksınalar arasynda Qazaqstan óndirisiniń 5 úmitker vaksınasy bar. Birinshisi – klınıkalyq zertteýler kezeńinde turǵan Bilim jáne ǵylym mınıstrligi Ǵylym komıtetiniń Bıologııalyq qaýipsizdik problemalary ǵylymı-zertteý ınstıtýty ázirlegen ınaktıvti vaksına. Qalǵan tórteýi – Ogaıo shtatynyń ýnıversıtetimen (AQSh) birlesip Qazaq ulttyq agrarlyq ýnıversıtetiniń, M.Aıqymbaev atyndaǵy Asa qaýipti ınfeksııalar ulttyq ortalyǵynyń, BQP ǴZI-dyń ázirlep jatqan jáne klınıkaǵa deıingi zertteýler satysyndaǵy sýbbirlik vaksına», dedi maman.
Aıta ketetin taǵy bir jaıt, Dúnıejúzilik densaýlyq saqtaý uıymy álem «rýhanı apat» aldynda tur dep málimdedi. Buǵan kovıdke qarsy vaksınanyń álem elderi arasynda teń bólinbeýi sebep. Osy ýaqytqa deıin vaksınanyń 39 mln dozasy 50-ge tarta aýqatty memleketterge taratylsa, kedeı elderdiń birine ekpeniń tek 25 dozasy berilgen. Bir qyzyǵy, Japonııada endi vaksınalaý mınıstri bar. Atalǵan qyzmetke ákimshilik reformalar mınıstri Taro Kono taǵaıyndalǵan. Ol azamattardyń koronavırýsqa qarsy ekpe alýyn qadaǵalaıtyn bolady. Elde aýqymdy naýqan aqpanda bastalady dep josparlanyp otyr.