Fýtboldan bıylǵy Qazaqstan Sýperkýbogyn erekshe formatta ótkizý josparlanyp otyr. Iаǵnı Sýperkýbokty burynǵydaı el chempıony men Qazaqstan kýbogynyń ıegeri sarapqa salmaıdy.
Jańa ereje boıynsha aldaǵy ýaqytta uıymdastyrylatyn Sýperkýbok básekesine 2020 jylǵy Qazaqstan chempıonatynda alǵashqy tórt oryndy ıelengen komandalar qatyspaq. Atap aıtar bolsaq, olar: birinshilik chempıony – «Qaırat», kúmis júldeger – «Tobyl», qola medal ıegeri – «Astana» jáne tórtinshi orynǵa taban tiregen «Shahter».
Kazfootball.kz aqparattyq portalynyń taratqan málimetine sáıkes, týrnırdiń jalpy júlde qory 40 mıllıon teńgeni quraıdy (shamamen 94,7 myń dollar). Al tórt komanda ishinde daralanyp jeńimpaz atanǵan klýbqa Qazaqstan Sýperkýbogy men 25 mıllıon teńge (shamamen 59,2 myń dollar) tapsyrylady. Kúmis júldeger atanǵan ujymǵa – 10 mıllıon teńge (23,7 myń dollar), qola medal ıegerine 5 mıllıon teńge (11,8 myń dollar) beriledi.