Qazaqstanda 2020 jyldan bastap shaǵyn bıznes sýbektilerin tekserýge úsh jyldyq moratorıı engizilgeni belgili. Alaıda Qarjy mınıstrligi salyqtyq tekserýler boıynsha erekshe jaǵdaılar tizimin keńeıtýdi usynyp otyr.
Atalǵan máselege qatysty Qazaqstan kásipkerleriniń quqyqtaryn qorǵaý jónindegi ýákil – bıznes-ombýdsmen Rýstam Júrsinov pikir bildirdi.
– Salyqtyq tekserýler úshin qosymsha erekshe jaǵdaılardy engizý shaǵyn bıznes sýbektilerine túsetin júktemeniń birshama artýyna alyp keledi. Mundaı ustanym Memleket basshysynyń tekserýge moratorıı engizý týraly tapsyrmasyna qaıshy. Moratorııde erekshe jaǵdaılar bolmaýy kerek. Al erekshe jaǵdaılar engiziletin bolsa, bıznes moratorııdi de, baqylaýdyń bosańdaǵanyn da sezinbeıdi, – dedi R.Júrsinov.
Qarjy mınıstrliginiń málimetinshe, 2019 jylmen salystyrǵanda byltyr kásipkerlerdiń 60 paıyzy kiris deńgeıin aıqyn tómendetken. Bıznes-ombýdsmenniń buǵan qatysty aıtar ýáji bar.
– Eldiń aýmaǵynda tótenshe jaǵdaı rejiminiń jarııalanýyna baılanysty 2020 jylǵy 16 naýryz – 15 sáýir aralyǵynda is júzinde barlyq bıznes sýbektileri qyzmetin tolyq toqtatty. Sonyń saldarynan tabys ta tómendedi. Osydan keıin kóptegen kásipkerler jumysyn toqtatýǵa májbúr boldy. Olardyń jumys ýaqyty shekteldi, kelýshiler sanyna shekteý qoıyldy, sonymen qatar karantındik sharalardy saqtaý úshin qosymsha shyǵynǵa batty. Tipti kásipkerlerdiń bir bóligi jumysyn áli kúnge bastaı almaı otyr. Kásipkerlik qyzmetten túsetin kiristiń azaıýy halyqtyń satyp alý qabiletiniń tómendeýimen de baılanysty. Osynyń bári kásipkerlerdiń tabys deńgeıiniń tómendeýine keri áser etti. Olar tabysyn jasyryp otyrǵan joq, – dedi bıznes-ombýdsmen.
R.Júrsinov Qarjy mınıstrligine eskertýler jiberilgenimen, olardyń qaperge alynbaǵanyn jetkizdi. Endi Prezıdent Ákimshiligine ótinish joldamaq nıette.