Premer-Mınıstr Asqar Mamın Qazaqstan aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysyn ótkizdi, - dep habarlaıdy Egemen.kz
Sanıtarlyq-epıdemıologııalyq jaǵdaı týraly densaýlyq saqtaý mınıstri Alekseı Soı, vaksına óndirý jónindegi jumys týraly bilim jáne ǵylym mınıstri Ashat Aımaǵambetov, karantındik sharalardyń saqtalýyn baqylaý týraly ishki ister mınıstri E. Turǵymbaev, óńirlerdegi ahýal týraly Aqmola oblysynyń ákimi Ermek Marjyqpaev, Qostanaı oblysynyń ákimi Arhımed Muhambetov, Soltústik Qazaqstan oblysynyń ákimi Qumar Aqsaqalov baıandady.
Qazaqstandaǵy qazirgi sanıtarlyq-epıdemıologııalyq jaǵdaı kúrdeli — respýblıka «joǵary qaýiptilik aımaǵyna» kirdi, 8 óńir «qyzyl aımaqta» tur: Nur-Sultan jáne Almaty qalalary, Aqmola, Atyraý, Batys Qazaqstan, Qostanaı, Pavlodar jáne Soltústik Qazaqstan oblystary. Kún saıyn 1,5 myńǵa jýyq jańa syrqattaný jaǵdaıy tirkeledi, reprodýktıvtik kórsetkishi – 1,14. Infeksııalyq tósek oryndarynyń júktemesi – 31%, reanımasııalyq – 20%.
QazCovid-in otandyq vaksınasy klınıkalyq synaqtardyń III kezeńinen ótýde (aldyn ala tıimdiligi – 96%). «Spýtnık V» vaksınasynyń sapasyn attestattaý jumystary júrgizilip jatyr. Halyqty «Spýtnık V-men» jappaı vaksınalaý 1 aqpanda bastalady.
Úkimet basshysy Bilim jáne ǵylym mınıstrligine Bıologııalyq qaýipsizdik problemalary ınstıtýty bazasynda QazCovid-in vaksınasynyń tájirıbelik partııasyn jáne «Antıgen» ǴО́K» JShS óndiristik alańynda tájirıbelik-ónerkásiptik partııany shyǵarýdy qamtamasyz etýdi tapsyrdy.
Premer-Mınıstr ákimdikterge vaksınany saqtaý úshin qajetti jabdyqtardy satyp alýdy aıaqtap, egý pýnktteriniń tolyq daıyndyǵyn bıylǵy 1 aqpanǵa deıin qamtamasyz etýdi tapsyrdy. Aqparat mınıstrligine Densaýlyq saqtaý mınıstrligimen birlesip, koronavırýs ınfeksııasyna qarsy vaksınalaý týraly aqparattyq-túsindirý jumysyn qamtamasyz etý, Ishki ister mınıstrligimen birlesip, vaksınalaý máselelerine qatysty arandatý jáne jalǵan aqparat taratý faktilerin ýaqytyly toqtatý tapsyryldy. Úkimet basshysy epıdemııaǵa qarsy is-sharalarǵa tartylǵan qyzmetkerlerdiń qaýipsizdigi máselelerine erekshe baqylaý jasaý qajettigin atap ótti.
«Vaksına óndirisin qamtamasyz etý jáne halyqty jappaı vaksınalaýdy ótkizý densaýlyq saqtaý salasyndaǵy Úkimettiń búgingi kúngi negizgi mindeti», — dedi A. Mamın.