Túrkistan oblysynda qar qursaýynda qalǵan otbasylarǵa kómek kórsetildi, dep habarlaıdy Egemen.kz
Kentaý-Ashysaı avtokólik joldary ótken apta sońynda aýa-raıynyń kúrt ózgerýine baılanysty ýaqytsha jabylǵan bolatyn. Aýyl turǵyndary qar qursaýynda qalyp, qatynas qıyndady. Osyǵan baılanysty Kentaý qalasy ákimdiginiń uıymdastyrýymen, Túrkistan oblysy Tótenshe jaǵdaılar departamentiniń ókilderi jáne №12 О́SB jeke quramy Ashysaı aýylyndaǵy taýly aýmaqtyń turǵyndaryna kómek qolyn sozǵan. Qolaısyz aýa-raıy kezinde jol talǵamaıtyn «KamAz» júk kóligimen Ashysaı aýylyndaǵy 40 otbasyn azyq-túlikpen qamtamasyz etti.
Turǵyndardyń qaýipsizdigin qamtamasyz etý maqsatynda «Avtokólik ıeleriniń nazaryna, uzaq jolǵa shyqpaýlaryn qatań eskertý» taqyrybynda - «Facebook», «Instagram», «Twitter», «WhatsApp» ınternet jelilerine beınetúsirilim arqyly daýyldy eskertý jóninde habarlandyrýlar jarııalanǵan. Alaıda oǵan qaramastan alys jolǵa shyqqan turǵyndar qar qursaýynda qalyp, qutqarýshylardyń kómegine júgingen. Kentaý qalasyndaǵy №12 О́SB baılanys beketine jolda qalyp qoıǵan avtokólik ıelerinen kómek suraǵan qońyraýlar kóbeıgen. Tótenshe jaǵdaılar bóliminiń qyzmetkerleri jáne №12 О́SB jeke quramymen jedel qutqarý jumystary júrgizildi.