Sybaılas jemqorlyqqa qarsy is-qımyl agenttiginiń tóraǵasy Alık Shpekbaev ótken jyly qylmystyq jaýapkershilikke tartylǵan laýazymdy tulǵalar jaıynda aıtty, dep habarlaıdy Egemen.kz.
«Biz jazanyń bultartpastyǵyn tolyǵymen qamtamasyz etemiz. Eseptik kezeńde 25 asa aýyr jáne 1368 aýyr qylmystyń, sondaı-aq júıeli sybaılas jemqorlyqtyń 112 faktisiniń joly kesildi. Sotta UQT qurý faktileri boıynsha 4 is qaralýda. Túrli dárejedegi 210 basshy qylmystyq jaýapkershilikke tartyldy. 722 adam sottaldy, onyń ishinde bir oblys ákimi, 4 oblys ákiminiń orynbasary, 2 jaýapty hatshy, 2 komıtet tóraǵasy, 1 elshi, 5 sýdıa, 10 aýdan ákimi jáne olardyń orynbasarlary. 5 vıse-mınıstr men 5 komıtet tóraǵasy men olardyń orynbasarlaryna, sonymen qosa kvazımemlekettik sektordyń 5 top-menedjerine qatysty qylmystyq ister tergelýde», dedi A. Shpekbaev.
Sondaı-aq ol «Astana LRT» qurylysy kezinde bıýdjet qarajatyn jymqyrý faktisi boıynsha birqatar laýazymdy tulǵa men merdiger uıymnyń basshylary sotqa joldanǵanyn atap ótti.
«SK-Farmasııa» basqarmasynyń burynǵy tóraǵasyna qatysty tergeý aıaqtaldy. BTA-Banktiń isi boıynsha 12 mlrd teńgeden astam zalal óteldi. Taǵy 6,4 mlrd teńge «Azyq-túlik korporasııasy» AQ basqarmasynyń burynǵy tóraǵasyna qatysty qylmystyq is aıasynda óteldi», dedi agenttik tóraǵasy.