«Azamattarǵa arnalǵan úkimet» memlekettik korporasııasynyń Almaty qalalyq fılıalynda Qaýipsizdik jónindegi ýákildiń bastamasy boıynsha sybaılas jemqorlyq qylmystardyń aldyn alýǵa arnalǵan is-shara ótti, dep habarlaıdy Egemen.kz.
Sybaılas jemqorlyqqa qarsy is-qımyl agenttiginiń Almaty qalalyq departamenti shtaby ókilderi men Qylmystyń jolyn kesý basqarmasy qyzmetkerleriniń qatysýymen ótken keńeste «Sybaılas jemqorlyqtyń jolyn kesý – sybaılas jemqorlyqqa qarsy qyzmettiń negizgi baǵyty» taqyryby boıynsha máseleler talqylandy. Fılıal qyzmetkerlerine sybaılas jemqorlyqty qabyldamaıtyn sanany transformasııalaý tetigi retinde parasattylyq negizindegi jumys qaǵıdattary, sybaılas jemqorlyqty rýhanıetıkalyq deńgeıde qabyldamaý ahýalyn qalyptastyrý týraly tolyq túsindirildi.
«Búginde elimizdiń sybaılas jemqorlyqqa qarsy saıasaty sybaılas jemqorlyqtyń aldyn alý jáne eskertý tetikterine negizdelgen. El Prezıdenti Sybaılas jemqorlyqtyń sebebi men sharttaryn joımaı onymen kúresý, bul – jel dıirmenmen alysý ekenin naqty atap ótti. Sondyqtan, fılıal sybaılas jemqorlyqqa qarsy is-qımyl Agenttiginiń Departamentimen birlesip Sybaılas jemqorlyq qylmystardyń aldyn alý boıynsha turaqty negizde is-sharalar ótkizedi. О́ıtkeni, sybaılas jemqorlyq - bul tereń áleýmettik aýrý jáne ony tek ortaq kúsh-jigermen jeńýge bolady», - deıdi «Azamattarǵa arnalǵan úkimet» memlekettik korporasııasynyń Almaty qalasy boıynsha fılıalynyń dırektory Danııar Qyryqbaev.
Uıymdastyrýshylar eń osal salalarda sybaılas jemqorlyqqa qarsy aldyn alý sharalarynyń róli burynǵydan da joǵary ekenin atap ótti.
«Sybaılas jemqorlyq – eki jaqty jyljıtyn jol. Munda tek para alýshy ǵana emes, para berýshi de bar. Sondyqtan búginde parasattylyq ıdeologııasyn ilgeriletý boıynsha belsendi jumys júrgizýdemiz», – deıdi Sybaılas jemqorlyqqa qarsy is-qımyl agenttiginiń Almaty qalasy boıynsha departamenti shtabynyń jetekshisi Zeınalov Nızam Asanuly.
Keńes sońynda qatysýshylarǵa sybaılas jemqorlyq qylmystarynyń aldyn alý boıynsha taptyrmas úlgi retinde qabyldaǵan arnaıy daıyndalǵan beınerolıkter kórsetildi.
Qyzmetkerlerdiń is-shara barysynda alǵan bilimderi, olardy ómirde týyndaǵan kez kelgen jemqorlyq ataýlydan aýlaq etetinine sengimiz keledi. Árbir azamat elimizdiń órkendeýi men gúldenýi – onyń sanaly áreketine baılanysty ekenin túsinýi tıis.