Jaqynda Eýropalyq Odaq vaksınaǵa qatysty daýly jaǵdaıǵa tap boldy. AstraZeneca vaksına óndirýshisi tamyz aıynda kelisilgen 300 mln doza vaksınany Eýroodaq elderine jetkize almaıtynyn málimdegen.
Onyń ústine kompanııa retteýshi organdardyń maquldaýynan keıin taǵy 100 mln vaksına berý múmkindigin qarastyrýǵa ýáde bergen. Alaıda óndiristegi qıyndyqtarǵa baılanysty ýáde etilgen vaksına kólemi Eýropaǵa jetpeıtin sekildi. Naýryzǵa deıin 100 mln doza vaksına alýy kerek bolǵan EO endi onyń tek tórtten birin – 25 mln dozasyn alýy múmkin. Odaq jetekshileri kompanııamen jasalǵan kelisimshartty jarııalaý arqyly AstraZeneca-ǵa qysym kórsetkisi kelgenimen, vaksına óndirýshisi Nıderland pen Belgııa zaýyttaryndaǵy qıyndyqqa baılanysty ýádesin oryndaı almaıtynyn aıtqan.
Osyǵan baılanysty Eýropalyq Odaq qatań synǵa qaldy. Jazǵa deıin halyqtyń 70 paıyzyn vaksınalaýdy maqsat etkenimen, shyn máninde, ózge damyǵan eldermen salystyrǵanda EO kósh sońynda keledi. Jalpy, basqalarmen salystyrǵanda vaksına máselesinde odaq asyǵystyq tanytpaǵan. Máselen, Ulybrıtanııa alǵashqy COVID-19 vaksınasyna 2 jeltoqsanda ruqsat bergen. Al EO bul áreketti tek aı sońynda qabyldaǵan. Osylaısha, vaksınaǵa ruqsat berýdiń ózi uzaqqa sozylǵan. EO elderine vaksınanyń jetpeýi kesh jasalǵan kelisimsharttarmen de baılanysty bolýy múmkin. Ulybrıtanııa, AQSh, Izraıl jáne basqa da elder vaksına óndirýshilerimen kelisimge áldeqaıda erte kelip qoıǵan. EO basshylyǵynyń kesh áreketi baıqaýsyz qalmady.