Almatyda indetke qarsy vaksınalaý bastaldy

Aldymen erikti vaksınalaýdan Almaty qalasy ákiminiń orynbasary Erjan Babaqumarov, Qoǵamdyq densaýlyq basqarmasynyń basshysy Narıman Tabynbaev pen qalalyq sanıtarlyq-epıdemııalyq baqylaý departamentiniń basshysy Jandarbek Bekshın, sonymen qatar máslıhat depýtaty, №5 Qalalyq klınıkalyq aýrýhananyń bas dárigeri B.Sadyqov ótti. Aty atalǵan laýazym ıelerine ekpe №5 qalalyq klınıkalyq aýrýhananyń bazasynda jasaldy.

Osylaısha, 1 aqpannan bastap Almatyǵa keshke qaraı jetkizilgen «Spýtnık V» vaksınasy paıdalanylady jáne preparat vaksınasııa júrgizetin emhanalarǵa bólindi.

Oqıǵaǵa oraılas, Almaty qalasy ákiminiń orynbasary Erjan Babaqumarov: «Vaksınasııa – bul pandemııamen kúrestegi sheshýshi qadam. Búgin men onyń mańyzdylyǵyn, qaýipsizdigin kórsetý úshin vaksınany qabyldadym. Jaqynda ózimizdiń otandyq vaksına egýge daıyn bolady. Biz ǵalymdarǵa senemiz. Sondyqtan men qala turǵyndaryna – barlyǵyna osy qadamdy jasaýǵa keńes beremin. Vaksınalaý júrip jatqan kezde biz maska taǵýdy, áleýmettik araqashyqtyqty saqtaýdy jalǵastyrýymyz jáne vırýspen kúresýdiń basqa sharalaryn qoldanýǵa tıispiz», dedi ol.

Vaksınalaýdy júrgizý úshin ekpe salatyn pýnktterdiń daıyndyǵy tekserildi. Profılaktıkalyq egýler júrgizýdiń standartty jumys tártibi bekitilip, barlyǵy 40 BMSK anyqtaldy. Immýndaý úshin Almaty QDB-dan 144 medısınalyq maman oqýdan ótip jatyr.

Árbir emhanada ımmýndaý júrgizetin salqyndatý jabdyqtary bar jeke vaksınalaý kabınetteri bar. Kabınetterde dáriger, meıirbıke-vaksınator jáne meıirbıke-tirkeýshi sııaqty mamandar jumys jasaıtyn bolady. Sonymen qatar vaksına alǵandardyń 30 mınýt dárigerlerdiń baqylaýynda bolýy úshin jeke bólmeler de qarastyrylǵan.

Erikti vaksınalaýǵa profılaktıkalyq ekpege qarsy kórsetkishteri joq adamdar jiberiledi. Vaksınalaý aldynda dáriger mindetti túrde tekserýden ótkizedi.

«Spýtnık V» vaksınasynyń alǵashqy 2050 dozasy Almatyǵa keshe Nur-Sultannan reıspen jergilikti ýaqyt boıynsha 20:30-da jetkizildi.