- Búgin qazaq baspasózi, jalpy, ulttyq jýrnalıstıka úshin aıryqsha kún desek, artyq bola qoımas. Sebebi, dál búgin el gazeti «Egemenniń» otyz myńynshy nómiri jaryq kórip otyr. Osy bir mereıli mejemen egemenqazaqstandyqtardy shyn júrekten quttyqtaımyn, - dedi Máýlen Áshimbaev.
Senat tóraǵasy ǵasyrlyq shejiresi bar bas basylymnyń ár nómiri ult tarıhynyń bir paraǵy deýge bolatynyn aıtty.
- Otanymyzdyń barlyq jetistigi men jeńisi, qoǵamdaǵy ózekti máseleler, eldiń kúndelikti tynys-tirshiligi gazet betterinen bir sátke de qalys qalǵan emes. Alash arystarynyń jáne Ǵabıt Músirepov, Sherhan Murtaza, Ábish Kekilbaıuly sııaqty qazaqtyń birtýar qaıratkerleriniń qoltańbasy qalǵan basylym, shyn máninde, «halyqtyń kózi, qulaǵy hám tili» retinde óz mindetin úlken abyroımen atqaryp keledi. Ádebıetimiz ben mádenıetimizdi, ulttyq rýhanııatymyz ben asyl qundylyqtarymyzdy jáne bilim men ǵylymdy dáripteý jolynda da «Egemenniń» orny bólek, - dedi ol.
Búgingi sanda myńynshy, bes myńynshy, on myńynshy jáne jıyrma myńynshy nómirdiń qalaı shyqqany týraly derekti materıaldar berilgen eken. Sheraǵańnyń basshylyǵymen jaryq kórgen jıyrma myńynshy nómir táýelsizdikke úsh aı qalǵanda, ıaǵnı 1991 jylǵy qyrkúıekte basylsa, otyz myńynshy nómir azattyqtyń 30 jyldyǵymen tuspa-tus kelip otyr. Munyń ózi erekshe atap óterlik jaıt, degen Senat spıkeri qazirgi tańda Darhan Qydyráli bastaǵan bas basylym «qazaq baspasóziniń qara shańyraǵy» deıtin brendti abyroımen saqtap kele jatqanyn da tilge tıek etti.
- «Egemenniń» osy bıikten tómendemeı, bedeli odan ári arta berýine tilektespiz. Gazet atyna zaty saı bolyp, egemendigimizdiń eńseli bolýyna óz úlesin qosa bersin, - dedi Máýlen Áshimbaev.