Bıyl – jyr alyby Jambyl Jabaevtyń týǵanyna 175 jyl. «HH ǵasyrdyń Gomeri» atanǵan uly jyraýdyń rýhty, otty óleńderimen qatar, Qulmanbet, Sarybas, Aıkúmis jáne ózge de aqyndarmen aıtysy saqtalǵan. Eldiń birligin, halyqtyń tatýlyǵyn jyrlap, bolashaq urpaqqa baǵa jetpes mura qaldyrdy. Jyraýdyń atymen atalatyn óńirde uly aqynnyń mereıtoıyna arnalǵan sharalar bastalyp ta ketti.
Jastardy otanshyldyq sezimge baýlý, patrıottyq rýhta tárbıeleý maqsatynda memlekettik «Ejelgi Taraz eskertkishteri» tarıhı-mádenı qoryq-mýzeıi «Ulystyń maqtanyshy – uly Jambyl» atty is-shara uıymdastyrdy. Atalǵan shara «Sherhan Murtaza atyndaǵy rýhanııat jáne tarıhtaný» ortalyǵynda ótti.
Áýeli kelýshiler Jambyl Jabaevtyń ómiri men óner jolynan syr shertetin kórmeni aralap kórdi. Atalǵan qoryq-mýzeıdiń tarıhshysy Mádına Ibadildaeva qonaqtardy jyraý ómiriniń túrli kezeńin qamtıtyn materıaldarmen tanystyrdy. Jıynda «Ejelgi Taraz eskertkishteri» tarıhı-mádenı qoryq-mýzeıiniń dırektory Nurlan Byqybaev sóz alyp, Jambyl shyǵarmashylyǵy tóńireginde óz oıymen bólisti. Al jazýshy-dramatýrg Elen Álimjan jyr alyby týraly Muhtar Áýezov, Ǵabıt Músirepov, Ábdilda Tájibaev sııaqty ádebıet qaıratkerleriniń estelikterin aıtyp, Jambyl shyǵarmashylyǵynyń erekshelikterine toqtaldy. Sondaı-aq oblystyq «Tarıhı-mádenı eskertkishterdi qorǵaý jáne qalpyna keltirý dıreksııasy» mekemesiniń dırektory Qýanysh Dáýrembekov Jambyl Jabaevtyń, Beıimbet Maılın, Ilııas Jansúgirov syndy sóz zergerlerimen tyǵyz baılanysta bolǵanyn tabylǵan arhıv derekteri negizinde áńgimelese, aıtysker aqyn Eset Dosaly Jambyl óńirinde jyr alybynyń jolyn qýǵan jas aıtyskerlerdiń ósip kele jatqanyn, olardyń aldy elimizdegi alaman aıtystarda top jaryp júrgenin jetkizdi. Sonymen qatar Asqar Toqpanov atyndaǵy oblystyq qazaq drama teatrynyń ártisteri áıgili Súıinbaı aqynnyń bala Jambylǵa bata berý sátin sahnalady. Ánapııa Ahmetov pen Nursultan Mahanov ustaz ben shákirt arasyndaǵy rýhanı sabaqtastyqty erekshe sheberlikpen jetkize bildi.
Jalpy, jıynda Jambyl Jabaevtyń ómiri men ónerin jańasha turǵydan zertteý, óńirde aqyn atyndaǵy konkýrstar uıymdastyrý, tapsyryspen ádebı dúnıeler jazdyrý, bir sózben aıtqanda, jyraý atyn ulyqtaý máselesi sóz boldy. Bul rette Qýanysh Dáýrembekov oblystyq mádenıet, arhıvter jáne qujattama basqarmasynda is-sharalar jospary jasalǵanyn, aldaǵy ýaqyttarda Taraz qalasynda aqyn atyndaǵy respýblıkalyq aqyndar músháırasymen qatar, aıtys uıymdastyrylatynyn da jetkizdi. Jyraý esimin ulyqtaý maqsatyndaǵy sharalar tek aqynnyń týǵan kúni aqpan aıynda ǵana emes, jyl boıy jalǵasatyn bolady.
Jambyl oblysy