Saılaý nátıjesine baǵa berildi

Alqaly jıynǵa Májilis depýtattary, ǵalymdar, saıasat­ta­nýshylar men azamattyq qoǵam ókilderi qatysty. Sarap­ta­malyq pikirtalas saılaý qory­tyndylaryn, sondaı-aq Máji­listiń jańa quramyn baǵalaý, Prezıdent Qasym-Jomart Toqaev 2021 jyly 15 qańtarda belgilegen ózekti kún tártibin eskere otyryp, Parlamenttiń jańa quramy jumysynyń basym baǵyttaryn tal­qylaý, belgilengen saıası re­for­malardy, eldiń partııa­lyq órisin damytýdyń yqtı­mal sulbasyn aıqyndaý taqyryp­ta­ryna arnaldy.

Konferensııany ashqan  ÁESI sarapshysy Erlan Mádıev óz sózinde «Úsh partııalyq Parla­ment­tiń saqtalýyn júıeniń bel­gili bir ornyqtylyǵynyń belgi­si jáne qoǵamda memlekettik ba­ǵyt­tyń turaqtylyǵy men sabaq­tas­tyǵyna suranystyń basymdyǵy dep sanaýǵa bolady», dep atap ótti.

Qazaqstannyń Halyq par­tııasynyń atynan sóz sóılegen depýtat Erlan Smaılov partııa qyzmetin transformasııalaý prosesi týraly egjeı-tegjeıli baıandap berdi. Onyń aıtýynsha, qoǵamda áleýmettik ádilettilikke, ómir súrý sapasyn jaqsartýǵa, ulttyq baılyqty ádil bólýge degen úlken suranys bolǵandyqtan, partııanyń ıdeologııalyq negizin ózgertý, kommýnıstik ıdeologııadan bas tartý jaqtaýshylar sanyn ulǵaıtýǵa múmkindik berdi.

Nur Otan partııasy atynan sóz sóı­legen depýtat Iýlııa Kýchıns­kaıanyń aıtýynsha, Parlamentke, onyń ishinde máslıhattarǵa saı­laýdyń proporsıonaldy júıe boıynsha ótkizilýi qazirgi saıası partııalardyń sapaly damýy jolynda kúshti serpin boldy. Onyń pikirinshe, atalǵan proses­ter nátıjesinde, partııalardyń óńirlerdegi jumysy kúsheıtildi. Bul turǵyda bıleýshi partııa úshin tizimderdi jańartýǵa, partııanyń ishindegi baılanysty nyǵaıtýǵa, onyń músheleri arasyndaǵy dıalog pen ózara árekettestikke múmkindik beretin praımerızdiń júrgizilýi erekshe mańyzdy boldy.

Birqatar sarapshynyń aıtýynsha, parlamenttik oppozısııanyń már­tebesin zańnamalyq turǵy­dan bekitý Parlamenttik pikir­ta­­las­tardyń aıtarlyqtaı jan­da­­n­ýyna yqpal etetin oń qadam bolady. Osyny eskergen «Alter­natıva» ózekti zertteýler orta­ly­ǵy­nyń dı­rektory Andreı Chebo­tarev ót­ken saılaý pikirtalastary ba­ry­synda bılik pen Úkimetke qa­­tań syn-pikir bildirilgendikten, op­­po­­­zı­sııanyń róline QHP par­tııa­­sy kóbirek sáıkes keletinin aıtty.

Saıasattanýshy Ǵazız Ábishev: «Parlamentke ótý shegin 7%-dan 5%-ǵa deıin tómendetý – qoǵam suranysyna jaýap qana emes, sonymen qatar shaǵyn partııalarǵa kelesi Májilis saı­laýyna túsý úshin tirkelip, baǵyn synap kórýge múmkindik», dep atap ótti. Onyń pikirin­she, partııalardy tirkeý ólshem­shart­taryn odan ári yryqtandyrý taıaý bolashaqta jańa saıası joba­lardyń paıda bolýyn yntalandyrady.

Jalpy, sarapshylar ótken saı­laý qorytyndysy eldegi par­tııalyq júıeniń turaqtylyǵy men tıimdiligin kórsetti degen ortaq pikirde boldy.