Atyraýǵa «Spýtnık V» vaksınasynyń 1 000 dozasy jetkizildi. Qaýipti vırýsqa qarsy atalǵan vaksınany saldyrý úshin bastapqy medısınalyq-sanıtarlyq kómek kórsetetin 24 mekemede arnaıy beketter jasaqtaldy. Atyraý qalasynda vaksına salatyn – 16, Maqat aýdanynda 2 beket ashyldy. Al ózge aýdandarda 1 beketten bar.
Oblystyq densaýlyq saqtaý basqarmasynyń basshysy Ashan Baıdýálıevtiń málimetinshe, vaksınalar arnaıy daıyndalǵan ekpe salý ortalyqtaryna taratylady. Birinshi kezekte vaksınany ınfeksııalyq stasıonarlar men reanımasııalyq bólimshelerdiń, jedel járdem stansasynyń medısına qyzmetkerlerine salý josparlanyp otyr. Sondaı-aq sanıtarlyq-epıdemııalyq baqylaý departamentine qarasty basqarmalardyń qyzmetkerleri alady. Vaksına salý úshin 144 qyzmetker arnaıy kýrstan ótti.
Atyraý qalasyndaǵy №3 emhanada «Spýtnık V» vaksınasyn alǵash saldyrǵandardyń qatarynda oblys ákiminiń orynbasary Baqytgúl Hamenova, oblystyq densaýlyq saqtaý basqarmasynyń basshysy Ashan Baıdýálıev, oblystyq sanıtarlyq-epıdemııalyq baqylaý departamentiniń basshysy Mádenıet Tanaýov, oblystyq onkologııalyq dıspanserdiń dırektory Elmıra Saparova jáne oblystyq aýrýhana dırektory Erbol Imanǵalıev bar.
– Dárigerler vaksına salmas buryn dene qyzýymdy ólshedi. Vaksına salýǵa arnalǵan kabınetten shyqqannan keıin dárigerdiń baqylaýynda boldym. Qazir jaǵdaıym qalypty, ózimdi jaqsy sezinip turmyn. Endi 21 kúnnen keıin vaksınanyń ekinshi bóligin alamyn, – dedi oblys ákiminiń orynbasary Baqytgúl Hamenova.
Atyraý oblysy