О́tken aıdan bastap zeınetaqy jınaǵynyń bir bóligin turǵyn úı jaǵdaıyn jaqsartýǵa, emdelýge paıdalaný nemese basqarýshy kompanııalarǵa ınvestısııalyq basqarýǵa berý quqyǵyn beretin zań júzinde jumystar bastaldy. Al 23 qańtardan bastap azamattar «Otbasy banki» arqyly zeınetaqy jınaǵyn paıdalanýǵa ótinim bere bastady. Osynaý bastamanyń alǵashqy nátıjeleri keshe Ortalyq kommýnıkasııalar qyzmeti alańynda málim boldy.
Brıfıng barysynda «Biryńǵaı jınaqtaýshy zeınetaqy qory» AQ basqarma tóraǵasy Janat Qurmanov naýqannyń alǵashqy qorytyndylary jaıly baıandady. Ol naýqanǵa qatysýshylar, eń aldymen, óz jınaqtaryn tekserip, jetkilikti sheginen asatyn somanyń bar ekenine kóz jetkizýi kerek ekenin eske saldy. Aqparatty elektrondy formatta alýǵa bolady. Ony enpf.kz saıtynda jeke kabınetten nemese ESQ paıdalana otyryp, mobıldi qosymshadan, sondaı-aq telegram bot arqyly jáne «Azamattarǵa arnalǵan elektrondy úkimettiń» mobıldi qosymshasy arqyly alýǵa bolady.
Bıyl 5-31 qańtar aralyǵynda BJZQ-ǵa túrli arnalar arqyly jeke zeınetaqy shotynan úzindi kóshirme surap, 1,2 mln-nan asa salymshy men alýshy júgingen. Olarǵa 3,7 mln úzindi kóshirme berildi. Bul rette azamattar úzindi kóshirmeniń 96%-yn qashyqtan jáne 4%-ǵa jýyǵyn BJZQ bólimshelerinen aldy.
«Azamattar óz shotynyń jaı-kúıi týraly aqparat alyp, eń tómengi qajetti jetkilikti somasynan asatyn qarjyny paıdalaný týraly sheshim qabyldap, ótinim berýge jáne turǵyn úı jaǵdaılaryn jaqsartýǵa, emdelýge aqy tóleý úshin zeınetaqy jınaqtaryn nysanaly paıdalaný sharttaryna baılanysty barlyq máseleni ýákiletti operatorlarǵa «bir tereze» qaǵıdaty boıynsha jiberedi. BJZQ-ǵa jeke ótinish berý talap etilmeıdi. Barlyq prosess avtomattandyrylǵan», dedi J.Qurmanov.
Qazirgi ýaqytta BJZQ 4 bankpen ózara is-qımyl týraly kelisim jasasty. Olar – «Otbasy bank» turǵyn úı qurylys jınaq banki» AQ, «Qazaqstan Halyq banki» AQ, «Altyn Bank» AQ, «Bank SentrKredıt»AQ.
25 qańtarda BJZQ ýákiletti operator – «Otbasy bankinen» ótinimder qabyldaı bastady. 28 qańtarda BJZQ-ǵa «Qazaqstan Halyq Banki» ýákiletti operatorynan ótinimder túse bastady. Osylaısha, ótinimderdi qabyldaý bastalǵannan bastap 30 qańtarǵa deıin BJZQ jalpy somasy 212,6 mlrd teńgege 38 507 ótinimdi aldyn ala maquldady jáne óńdeýge qabyldady.
«Taldaý kórsetkendeı, ótinimderdi qabyldamaýdyń negizgi sebebi – ótinimde kórsetilgen suratylatyn soma zeınetaqy jınaqtaryn alý úshin qoljetimdi somadan asyp ketýi. Qaıta berilgen ótinimder boldy. BJZQ-da jınaqtary joq salymshylardan jekelegen ótinimder kelip tústi. Durys resimdelmegen basqa da ótinimder boldy. Sondyqtan salymshylarǵa alý somasy durys bolýy úshin aqparatty muqııat tekserý qajet ekenin taǵy aıtamyz. 2021 jyldyń 1 aqpanynda BJZQ 25 qańtarda kelip túsken ótinimder boıynsha tólem júrgizýdi bastady. Salymshylardyń 8 454 ótinimi boıynsha shamamen 49,2 mlrd teńge ýákiletti operator – «Otbasy bankindegi» arnaıy shottarǵa aýdaryldy», dedi qor basshysy.
106,5 myń qazaqstandyq «TQJB24» mobıldi qosymshasy jáne «Otbasy bank» saıtyndaǵy beıneqońyraý arqyly arnaıy aǵymdaǵy shottar ashty. Enpf-otbasy.kz onlaın-platformasynda 81 myń adam birjolǵy zeınetaqy tólemderin alýǵa ótinim berdi. BJZQ 50 519 ótinimdi maquldady. Birinshi kezeń aıaqtaldy. Olardyń ótinimderi boıynsha arnaıy shotqa aqsha aýdarylýda.
«Otbasy bank» turǵyn úı qurylys jınaq banki» basqarma tóraıymy Lázzat Ibragımovanyń aıtýynsha, áleýmettik jelilerdi paıdalanýshylardan kelip túsken kóptegen ótinishterdi eskere otyryp, bank portaldy jańǵyrtý týraly sheshim qabyldady.
«Sırek kezdesetin, biraq óte tabandy ótinish boldy, bul – ótinimniń maqsatyn túzetýge múmkindik berý. Iаǵnı aldymen adam qaryzdy óteýge ótinish bergen, al endi ıpotekaǵa jańa páter satyp alǵysy keledi. Ekinshi ótinish – ótinimdi joıý múmkindigi. Kóbi aqshanyń baryn, onyń aýdarylǵanyn jáne jyl sońyna deıin barlyq operasııalardy oryndaı alatynyn teksergisi kelgen. Mundaı múmkindik te beriledi. Úshinshi usynys – qazirdiń ózinde jiberilgen ótinimder, mysaly, qaryzdy óteýge, sol ótinimge qosymsha ótinish berýshi – týysty tirkeý. Biz bul múmkindikti de pysyqtap jatyrmyz. 10 kúnniń ishinde ol daıyn bolady dep oılaımyn», dedi bank basshysy.