Qurlyqtyq hokkeı lıgasynyń (QHL) kezekti týr oıynyn Nur-Sultannyń «Barysy» elordada Ekaterınbýrgtiń «Avtomobılıstimen» ótkizdi.
Osynyń aldynda Ýfanyń «Salavat Iýlaevynan» 3:2 esebimen jeńilgen jerlesterimiz bul joly da dál sondaı eseppen «Avtomobılıstke» jol berdi. Kezdesý «Barys» úshin óte sátsiz bastaldy. Matchtyń 7-mınýtynda qonaqtardan Nıkıta Trıamkın mergendigimen kózge tússe, 14-mınýtta Georgıı Beloýsov «Avtomobılıstiń» ekinshi shaıbasyn soqty. Tek birinshi kezeńniń sońyna qaraı es jıǵan «Barys» oıynshylary 16-mınýtta esep aıyrmasyn qysqartýǵa múmkindik aldy. Bul joly Iаkob Lılıa qaqpany dál kózdedi.
Kezeńaralyq úziliste biraz tynyǵyp, bas bapker Iýrıı Mıhaılısten qajetti aqyl-keńes alǵan jerlestermiz muzaıdynǵa shyǵa sala tablodaǵy kórsetkishti teńestirdi. Darren Dısten tamasha pas alǵan Fılıp Varone shaıbany qaqpaǵa toǵytyp, jankúıerlerdiń keýdesinde úmit otyn jaqqan edi. Alaıda úshinshi kezeńde muzaıdyn ıelerine qaraǵanda áldeqaıda shıraq qımyldaǵan «Avtomobılıst» oıynshylary tarazy basyn ózderine aýdardy. 58-mınýtta Dmıtrıı Jýkenov gol soǵyp, sońǵy mınýttarda «Barysty» san soqtyryp ketti.
Bul oıynnan keıin jerlesterimiz turaqty birinshiliktiń «Shyǵys» konferensııasyndaǵy týrnır kestesinde 6-orynnan 8-satyǵa syrǵyp ketti. «Barys» kelesi kezdesýin búgin syrt aıdynda Magnıtogorskiniń «Metallýrgimen» ótkizedi.