Qazaqstandyq tennısshi Aleksandr Nedovesov Túrkııanyń Antalııa qalasynda máresine jetken «Chellendjer» týrnıriniń juptyq básekesinde jeńimpaz atandy.
Jerlesimiz atalǵan týrnırde ýkraınalyq Denıs Molchanovpen jup qurap, fınalda osy jarystyń birinshi raketkalary sanalǵan venesýelalyq Lýıs Davıd Martınes pen ıspanııalyq Davıd Vega Ernandes jubymen bas júldeni sarapqa saldy. Tartysty ótken básekeniń alǵashqy partııasynda Martınes pen Ernandes 6:3 esebimen basym túskenimen, ekinshi partııada qazaq-ýkraın juby 6:4 nátıjesimen qarymta qaıtardy. Al taı-breıkte Nedovesov pen Molchanovtyń baǵy janyp, 18:16 esebimen jeńisti julyp aldy.
Osylaısha 33 jastaǵy A.Nedovesov qazaqstandyq tennısshiler arasynan jańa jyldaǵy alǵashqy iri jeńisine qol jetkizdi. Bul – onyń juptyq jarys boıynsha «Chellendjer» týrnırlerindegi 16-shy tabysy. Aıta keteıik, jarystyń júlde qory – 44 myń AQSh dollaryn quraıdy.