Shaıbaly hokkeıden bıylǵy álem chempıonaty jospar boıynsha 21 mamyr men 6 maýsym aralyǵynda Latvııa men Belarýste ótýi kerek edi. Alaıda qańtarda Halyqaralyq hokkeı federasııasy (IIHF) Belarýstegi qazirgi jaǵdaı resmı uıym ókilderine, quramalarǵa jáne jankúıerlerge qaýipti dep eseptep, álem chempıonatyn ótkizý quqynan aıyrǵan bolatyn.
Mine, kúni keshe IIHF osy jylǵy jahandyq doda tolyǵymen Latvııada ótetinin resmı málimdedi. Sóıtip, aldaǵy ýaqytta hokkeıden álem chempıonatyndaǵy matchtardyń barlyǵyn Rıga qalasy qabyldaıdy. Sonymen qatar matchtardyń basym bóligi de Latvııanyń bas shaharynda ornalasqan «Arena Rıgada» uıymdastyrylady dep josparlanýda.
Atap aıtar bolsaq, munda V tobyndaǵy barlyq oıyn, eki shırek fınaldyq match, jartylaı fınaldyq kezdesýler, úshinshi oryn úshin kezdesý jáne fınaldyq match ótkiziledi. Al qalǵan kezdesýler alty myń adamǵa arnalǵan Olımpıadalyq sporttyq ortalyqta uıymdastyrylady.
«IIHF keńesi seısenbi kúni ótken otyrysta álem chempıonatyn ótkizýdiń túrli nusqalaryn qarastyrdy. Naqtylaı túser bolsam, bıylǵy birinshilikti Latvııada, Latvııa men Danııada jáne Latvııa men Slovakııada ótkizý máseleleri talqylandy. Nátıjesinde, keńes músheleri álemdik dodany bir memlekette ótkizgen durys degen toqtamǵa keldi», deıdi IIHF prezıdenti Rene Fazel.
Bir aıta keterligi, Latvııa shaıbaly hokkeıden álemdik dodany osymen ekinshi márte qabyldamaq. Alǵash ret munda 2006 jylǵy álem birinshiligi ótkizilgen edi.
Qazaqstan quramasy 2019 jyly joǵary dıvızıonǵa oralǵan bolatyn, sondyqtan bıylǵy álem chempıonatynda baq synaıdy. Jerlesterimiz Kanada, Fınlıandııa, AQSh, Germanııa, Latvııa, Norvegııa, Italııa quramalarymen B tobynda synǵa túsedi.