Investısııalar tartý boıynsha júrgizilip jatqan júıeli jumys aıasynda táýelsizdik jyldary elimizge 360 mlrd dollardan astam tikeleı sheteldik ınvestısııalar tartyldy.
Memleket basshysy Qasym-Jomart Toqaevtyń Qazaqstanǵa sheteldik bıznesti tartý boıynsha jumysty kúsheıtý qajettiligi týraly tapsyrmasyn oryndaý maqsatynda Kazakh invest tarapynan aıtarlyqtaı jumys atqaryldy.
«Pandemııaǵa jáne birqatar shekteý sharalaryna qaramastan, 2020 jyldyń qorytyndysy boıynsha Kazakh invest qoldaýymen somasy 1,6 mlrd dollar bolatyn 36 jańa ınvestısııalyq joba iske asyryldy. Onyń ishinde Qaraǵandy oblysynda «Linde Group» nemis TUK qatysýymen tehnıkalyq gaz óndirisi, Túrkistan oblysynda «Polcotton» polıak kompanııasynyń qatysýymen jylyjaı kesheni, Almaty oblysynda BAÁ TUK qatysýymen qurama jem óndirisi, sondaı-aq el óńirlerinde jalpy qýaty 368 MVt JEK 7 jobasy iske qosyldy», dedi Kazakh invest Basqarma tóraǵasynyń orynbasary Ǵalym О́zbekov.
Karantındik sharalardy jeńildetý kezeńinde Kazakh invest elimizdiń ınvestısııalyq ımıdjin ilgeriletý boıynsha birqatar is-shara uıymdastyrdy. Pikirtalastarǵa Soltústik Eýropa, BAÁ, Ulybrıtanııa, Germanııa, Túrkııa, QHR jáne Ýkraına elderiniń isker toptarynyń ókilderi qatysty. Onlaın formatta álemniń 50-den astam elinen 6 myńǵa jýyq adamdy qamtıtyn 40-tan astam taqyryptyq vebınar uıymdastyryldy.
Sondaı-aq jyl qorytyndysy boıynsha Qazaqstanǵa Kazakh invest qoldaýymen AQSh, Germanııa, Reseı, BAÁ, Úndistan, Ońtústik Koreıa jáne basqa elderden 70-ten astam sheteldik bıznes-delegasııa keldi. Investorlardyń 2 myńnan astam aýyzsha jáne jazbasha ótinishi qaraldy.
«Investısııalardy tartýdyń úsh deńgeıli júıesiniń jumysyn nyǵaıtý maqsatynda 65 eldik ınvestısııalyq baǵdarlama ázirlendi, onyń sheńberinde ınvestısııalyq jobalardy irikteý jáne súıemeldeý, sondaı-aq belsendi ınvestorlardy anyqtaý máselelerine naqty kózqaras boıynsha jumys júrgiziletin bolady. Olardyń strategııalyq damý josparlaryn eskere otyryp, biz yqtımal ınvestorlardy iriktep alyp, olardy Qazaqstanda óz jobalaryn iske asyrýǵa shaqyra alamyz», dedi Ǵ.О́zbekov.
Sonymen qatar ınvestısııalyq saladaǵy ınstıtýsıonaldyq ózara is-qımyldy kúsheıtýge kóp kóńil bólinedi. Mysaly, 2020 jyldyń kúzinde barlyq amerıkalyq iskerlik qoǵamdastyqty biriktiretin AQSh Saýda palatasy janynan Qazaqstan-amerıkalyq iskerlik keńesi quryldy. 2021 jyldyń basynda AQSh, Qazaqstan jáne О́zbekstan úkimetteri Ortalyq Azııa ınvestısııalyq áriptestigin qurý týraly málimdedi. Bul bastama aıasynda AQSh-tyń halyqaralyq qarjy damý korporasııasy (DFC) Qazaqstan men О́zbekstanǵa 5 jyl ishinde keminde 1 mlrd dollar ınvestısııa quıýdy josparlap otyr.
Sondaı-aq ınvestısııalyq ahýaldy jaqsartý, quqyqtyq bazany jetildirý jáne strategııalyq ınvestorlardy qoldaý maqsatynda ınvestorlardy qoldaýdyń jańa quraly – ınvestısııalar týraly kelisim engizildi.
Halyqaralyq uıymdardyń jahandyq ınvestısııalyq aǵyndardyń tómendeýi týraly boljamdaryn nazarǵa ala otyryp, Kazakh invest tarapynan ınvestısııalyq múmkindikterdi jyljytýdy kúsheıtý, Qazaqstanǵa ınvestorlardy tartý, sondaı-aq bıyl 40-tan astam jańa óndiristi iske qosýǵa járdem kórsetý boıynsha belsendi jumys jalǵastyrylatyn bolady.