Aqmola oblysynyń bas sanıtarlyq dárigeri Aınagúl Mýsına men onyń orynbasary Sáýle Sádýaqasova jáne birneshe máslıhat depýtaty Kókshetaý №2 qalalyq emhanasynda, oblys ákiminiń orynbasary Ǵalymjan Ábdihalyqov, oblys ákimi apparatynyń basshysy Azamat Qapyshev, oblystyq densaýlyq saqtaý basqarmasy basshysynyń orynbasary Narıman Syzdyqov, Aqmola oblystyq kópbeıindi aýrýhanasynyń bas dárigeri Nurlan Jarov jáne taǵy basqalary oblystyq kópbeıindi aýrýhanada reseılik «Spýtnık V» vaksınasyn aldy.
Bas sanıtarlyq dárigerdiń aıtýynsha, vaksına alǵan adamdardyń jaǵdaıy jaqsy, eshbir ózgeris baıqalmaıdy. Ekpe ektirý úshin kelgenderdiń bári ekpeni almas buryn arnaıy medısınalyq baıqaý kabınetinde dárigerlik tekserýden ótip, saýaldama toltyryp, ekpege óz erkimen kelgenin rastaıtyn qujatqa qol qoıypty. Tekseristen ótken soń, reseılik «Spýtnık V», ıaǵnı ǵylymı-farmasevtıkalyq ataýy «Gam-kovıd-vak» vaksınasyn aldy. Bir quty bes adamǵa deıin berýge jetedi. Ekpe arnaıy muzdatqyshta belgilengen temperatýrada saqtalyp, bólme temperatýrasymen eritilip, birden beriledi.
Sonymen birge úsh kún boıy ýchaskelik dárigerler vaksına alǵan adamǵa habarlasyp, jaǵdaıyn bilip turýy qajet. Eger indetpen aýyryp turǵan adamdar bolsa, olar jarty jyl boıy vaksına almaýlary tıis. Qazaqstandyq vaksına bolsyn, reseılik bolsyn quramy bir. Sondyqtan qaısysyn alsa da adamda indetke qarsy ımmýnıtet bolady. Vaksına 18 ben 60 jasqa deıingi adamdarǵa erikti túrde beriledi. Júkti jáne bala emizetin áıelderge ekpe alýǵa tyıym salynady. Vaksınany alǵan adam kópshilik jerge barmaı, ózin oqshaýlaǵany abzal.
Birinshi kúni vaksınany 120 adam aldy. Bul reseılik «Spýtnık V» preparaty kórshi memlekette jappaı egilip jatyr. Oblystyq kópbeıindi aýrýhanasynyń bas dárigeri Nurlan Jarovtyń aıtýynsha, vaksınany aýrýhanada vırýsty juqtyryp alý qaýiptiligi joǵary medısına qyzmetkerleri alady. Aýrýhananyń 73 qyzmetkeri atalǵan ekpeni erikti túrde alypty. Vaksına egetin qyzmetkerler aldyn ala oqytylyp, preparatty saqtap, qoldanýdyń talaptaryn saqtaǵan.
– Men koronavırýspen aýyrǵan joqpyn, sondyqtan oǵan qarsy ımmýnıtet qalyptastyrý úshin vaksına alýǵa bel býdym. Bul ekpeniń basqa ekpelerge qaraǵanda eshqandaı aıyrmashylyǵy joq. Jyl saıyn tumaýǵa qarsy ekpeni barshamyz alyp júrmiz. Basqa da aýrýlarǵa qarsy ekpelerdi alýǵa ýchaskelerimizge baramyz. Ekpeden keıingi jaǵdaıym jaqsy. Men ózim mamandyǵym boıynsha mal dárigerimin, sondyqtan ımmýnıtet qalyptastyrý úshin ne kerektigin jaqsy bilemin. Bul vaksına barshamyzǵa kerek dep oılaımyn, – dedi oblys ákiminiń orynbasary Ǵalymjan Ábdihalyqov.
Sonymen birge Kókshetaý qalalyq №1 emhanasynda da ekpe egý bastaldy. Bul jerde oblystyq densaýlyq saqtaý basqarmasy basshysynyń orynbasary Narıman Syzdyqov bastaǵan ondaǵan adam koronavırýs juqpasyna qarsy ekpe aldy.
Aqmola oblysy