Álemde koronavırýspen kúres údeı tústi

Djon Hopkıns ýnıversıtetiniń málimetine súıensek, 30 qańtarda 504 myńnan astam adam vırýs juqtyrsa, 31 qarashada bul kórsetkish 395 myńǵa deıin azaıǵan.

Jalpy, bıylǵy qańtarda koronavırýs ınfeksııasy qaıta kúshine mingenin aıta ketken jón. Buǵan deıin antırekordtyq nátıje 7-8 qańtarda tirkeldi. Sol ýaqytta bir táýlikte dertke shaldyqqandar sany 840 myńnan asyp tústi.

Qazirgi tańda vırýs juqtyrǵandar sany boıynsha AQSh áli de alda tur. Onda 27 mln-ǵa jýyq adamnan qaýipti ınfeksııa anyqtalǵan. Kún saıyn 100 myńnan astam adam dertke shaldyǵady. Vırýs tirkelgeli beri bul elde 453 myńǵa jýyq naýqas qaza tapty.

Úndistandaǵy jaǵdaı túzelip keledi. Koronavırýs juqtyrǵandar sany bul elde 11 mln-ǵa taıap qaldy. Degenmen kúndelikti belgili bolǵan naýqastar sany 10 myń shamasynda. Sońǵy ret Úndistanda mundaı nátıje maýsymda tirkelgen edi. Qaıtys bolǵandar sany 155 myńǵa jýyqtady.

Brazılııadaǵy ahýal áli de kúrdeli qalpynda qalyp otyr. Bul eldegi sta­tıstıkalyq kórsetkishter kóńil kón­shiterlik emes. Máselen, 30 qańtarda 50 myńnan astam adamnan vırýs tabylǵan. Al 31 qańtarda jańa naýqas­tar sany 27 myńǵa deıin túsken. Sa­rap­shylardyń paıymdaýynsha, Brazılııadaǵy statıstıkanyń bulaı qubylýyna birneshe faktor áser etedi. Birinshiden, atalǵan eldegi test synamasyn alý júıesine aıtylatyn syn kóp. Ekinshiden, Brazılııada birneshe vaksına synaq retinde ótkizilip jatyr. Osynyń bári jıyla kele jańa tirkelgen naýqastardyń statıstıkasy ala-qula bolýyna áser etip otyr.

Koronavırýs juqtyrǵandar sany 3 mln-nan asqan Fransııa shekarasyn qaıta qymtaýǵa kóshti. О́tken jeksenbiden bastap Eýropalyq odaqqa múshe memleketterden basqa elderge shyǵýǵa jáne kirýge tyıym salyndy.

Sondaı-aq eldegi karantındik shekteý sharalary odan ári kúsheıtildi. Máselen, barlyq saýda ortalyqtary men iri dúkenderdiń jumysy toqtatyldy. Shaǵyn dúkender men saýda úıleri ishine bir ýaqytta júretin adamdardyń sany shekteldi.

El aýmaǵynda vırýs juqtyrǵandar sany kúndelikti 24 myńnyń shamasynda. Biraq dárigerler vırýstyń jańa shtammdary taralýyna alańdaýshylyq bildirip otyr. Densaýlyq saqtaý mınıstrliginiń paıymdaýynsha, Fransııada engizilgen shekteý sharalary ázirge jańa lokdaýn engizýge jol bermeıdi.

Budan basqa, Eýropanyń birqatar elinde koronavırýstyń taralýyna baılanysty shekaralar jabylyp jatyr. О́tken jumada Ulybrıtanııada úıdegi saýyq keshterine jınalǵandarǵa aıyppul salyna bastady. Osylaısha, «Tumandy Albıonda» 15 adamnan kóp jınalsa, 800 fýnt kóleminde aıyppul salynady. Alda-jalda bir ret karantındik talapty buzǵan adam taǵy da tártip buzsa, aıyppul eki eselenedi.

Aǵylshyndardyń mundaı qadamǵa barýyna koronavırýstyń ulybrıtanııalyq shtammy áser etip otyr. Esterińizde bolsa, qańtardyń basynda vırýstyń jańa túri tez taralyp, kúnine on myńdaǵan adam qaýipti dertke shaldyqqan edi. Son­daı-aq jańa shtammnan qaza tapqan­dar sany da kúrt artty. Máselen, ótken aıda 33 myń adam osy dertten qaza tapty.

Búginde Ulybrıtanııada 3,8 mln-nan astam adam naýqastanǵan. 106 myń adam kóz jumdy. Vırýs juqtyrǵandar sany boıynsha «Tumandy Albıon» besinshi orynda tur.

Germanııa bıligi elge Brazılııa, Ulybrıtanııa, Irlandııa, Portýgalııa jáne OAR-dan keletinderdiń kirýine shekteý qoıdy. Atalǵan memleketterde koronavırýstyń jańa shtammdary taralǵan. Berlın vırýstyń qaıta taralýyna jol bermeýge baryn salyp otyr. Qazirgi tańda elde aýrý juqtyrǵandardyń úlesi 1 mln adamǵa shaqqanda 944 adam. Bul – qazan aıynan beri eń tómengi kórsetkish.

Sonymen qatar Germanııa Pfizer kompanııasy ázirlegen vaksınanyń taǵy 40,2 mln dozasyna tapsyrys berdi. Reıters agenttiginiń habarlaýynsha, el bıligi ekpeniń der kezinde jetkizilmeı qalýyn da eskergen.

Sondyqtan shyǵar, Germanııanyń Den­saýlyq saqtaý mınıstri halyqqa jap­paı vaksına salý maqsatynda basqa da sha­ralar qabyldamaq. Atap aıtqanda, ne­mis­ter reseılik jáne qytaılyq ekpe­ler­di satyp alýdy josparlap otyr. Qa­zir­­gi tańda bul elde 2 mln-nan astam adam ǵana vaksına saldyrtqan. Bul – basqa eýropalyq elderden áldeqaıda az.

Norvegııada da shekaralar tumshalana bastady. Jańa qaýlyǵa sáıkes, elde turmaıtyndar Norvegııaǵa kire almaıdy. Bul tizimge medısınalyq qyzmetkerler men taýar jetkizýshiler ǵana engizilmeıdi. Buǵan deıin el astanasy Oslo qalasy men onyń mańyndaǵy birneshe aýdanda qatań karantın jarııalanǵan bolatyn.

Reseı tarapy kóktemde koronavırýs­tyń taralýy báseńdeıtinine senimdi. «Rospo­trebnadzor epıdemıologııa» orta­lyq ǵylymı-zertteý ınstıtýty dırek­torynyń ǵylymı jumystar jónindegi orynbasary Aleksandr Gorelov jaǵdaı turaqtalyp kele jatqanyn málimdedi.

Reseıde koronavırýspen kúres jó­nin­degi federaldy jedel shtabtyń máli­meti boıynsha aýrý juqtyrýdyń 3,8 mln jaǵdaıy tirkelgen. Sonyń ishinde 73 182 naýqas qaıtys bolǵan.

Dýbaı bıligi sheteldik týrısterge arnalǵan karantındik shekteýlerdi jańartty. Jańa hattamaǵa sáıkes, 2021 jyldyń 31 qańtarynan bastap PTR testin ótkizý ýaqytyna qatysty ózgeris engi­zil­di. Buǵan deıin týrısterde 96 saǵat­tan aspaıtyn merzim ishinde tapsyryl­ǵan testiń nátıjesi bar anyqtama bolýy talap etiletin edi. Endigi jerde PTR synaǵynyń ýaqyty 72 saǵattan aspaýy kerek. Koronavırýs testileri 12 jasqa deıingi balalar úshin qajet emes jáne BAÁ azamattarynan talap etilmeıdi.

Dýbaıdyń daǵdarystar men apattardy basqarý jónindegi joǵarǵy komı­tetiniń habarlaýynsha, jedel testileý endi Dýbaıdyń barlyq áýejaıynda ótkiziledi. Osylaısha, PTR synaǵyn talap etetin elderge ushý rásimi birshama jeńildedi.

Vırýstyń áli de aýyzdyqtaýǵa kónbeýi álem elderin vaksına saldyrýdy tezdetýge umtyldyrýda. Qytaıda 31 qańtarǵa deıin koronavırýsqa qarsy vaksınanyń 24 mln-nan astam dozasy salynǵan. Bul týraly ótken jeksenbide Memlekettik keńestiń koronavırýsqa qarsy kúres jónindegi baspasóz jıynynda  Vırýstyq aýrýlardy baqylaý jáne aldyn alý ınstıtýtynyń dırektory Sıýı Venbo málimdedi.

Onyń aıtýynsha, byltyrǵy jeltoq­sannan bastap Qytaıda halyqqa jappaı koronavırýsqa qarsy ekpe salynyp jatyr. «Qazirgi ýaqytta el ishindegi egý pýnktterinde tirkelgen ıneksııalardyń jalpy sany 24 mln dozadan asty», dedi Venbo.

Eýropanyń Dári-dármek jónindegi agenttigi (EMA) AstraZeneca farmakolo­gııalyq kompanııasy shyǵarǵan koronavı­rýsqa qarsy vaksınany qoldanýǵa keńes berdi.

AstraZeneca – Eýropalyq odaqta qoldanýǵa ruqsat etilgen úshinshi vaksına. Buǵan deıin Pfizer/BioNTech jáne Moderna kompanııalarynyń vaksınalary qoldanysqa engen bolatyn. Eýropanyń Dári-dármek jónindegi agenttigi keltirgen derekterge súıensek, ázirge AstraZeneca-nyń 55 jastan asqan adamdardaǵy ımmýnıtetti qanshalyqty qalyptastyratyny belgisiz. О́ıtkeni zertteý qorytyndylary jetkiliksiz.

Degenmen ókiletti organ basqa vaksı­na­lar­dyń tıimdiligin eskerip, AstraZeneca ekpesiniń de vırýsqa qarsy paıdasy mol bolatynyna senimdi. Aldaǵy ýaqytta kompanııa zertteý nátı­je­lerin jarııalaǵannan keıin qazirgi qaýip múldem seıilmek.

AstraZeneca vaksınasy adam aǵza­syna 4-ten 12 aptaǵa deıingi ýaqytsha kezeńde eki ıneksııamen engiziledi. Bul medısınalyq preparat Ulybrıtanııada qoldanysqa engizilgen.