Eseptik kezdesýde shahar basshysy qalanyń ótken jylǵy áleýmettik-ekonomıkalyq damý kórsetkishteri men jyl kóleminde qol jetken jetistikterine toqtalyp, bıylǵy jumys josparyn tanystyrdy, dep habarlaıdy Egemen.kz.
Jalpy jyl qorytyndysynda Syrdyń bas shahary barlyq negizgi kórsetkishter boıynsha oń nátıjelerge ıe boldy. Atap aıtqanda, qala bıýdjeti 94 mlrd teńgeni qurap, ónerkásip ónimderiniń óndiris kólemi 480 mlrd teńgege jetken. Negizgi kapıtalǵa salynǵan ınvestısııa kólemi 105 paıyzǵa artyǵymen oryndalyp, oblysqa salynǵan ınvestısııanyń 52 paıyzy Qyzylorda qalasynyń úlesine tıesili boldy.
Qoǵamdyq keńes múshelerine esep berý barysynda qala ákimi 2020 jyly qarjylandyrýdyń barlyq kózderi esebinen jalpy aýdany 371 myń 314 sharshy metr turǵyn úı paıdalanýǵa berilgenin aıtty.
«Jol-kólik ınfraqurylymyn damytýda da jańa jobalar júzege asty. Respýblıkalyq jáne jergilikti bıýdjetten bólingen 9 mlrd teńgege 408 kóshege aǵymdaǵy, ortasha jáne kúrdeli jóndeý jumystary júrgizildi» - degen shahar basshysy birneshe mádenıet, bilim nysandary kúrdeli jóndeýden ótkizilip, «Taǵzym» memorıaly, "Syr Ana" monýmenti, «Temir jol» parki, Nazarbaev dańǵyly abattandyrylǵandyǵyn da atap ótti.
Bıylǵy jumys josparyn ortaǵa salǵan qala ákimi 51,3 shaqyrym bolatyn 94 kóshege qıyrshyq tas tóselip, Syrdarııa ózeniniń sol jaǵalaýynan apattyq úılerde turatyn otbasylar úshin 50 páterlik turǵyn úı qurylysy júrgiziletinin jetkizdi, Qala ákimdigine halyqtan kelip túsken aryz-shaǵymdardyń basym bóligi kóp balaly otbasylardy turǵyn úımen qamtamasyz etýge qatysty bolyp otyr. Osyǵan baılanysty qalada jeke ınvestorlar qarjysyna salynyp jatqan turǵyn úılerden 60 páter satyp alynady. Turǵyndar ótinishine oraı kóp qabatty úılerdiń aýlalaryna oıyn alańdaryn salý baǵytynda jumystar júrgiziletindigin atap ótti. Sonymen qatar josparǵa saı negizgi basymdyq – jumyspen qamtý jáne áleýmettik qorǵaý, ekonomıkany ártaraptandyrý, ınfraqurylymdy damytý sekildi máselelerge berilgendigin aıtty.
Eseptik kezdesýde sóz alǵan qalalyq máslıhat hatshysy Ibadýlla Quttyqojaev 2020 jyly qalada aýqymdy jumys jasalǵandyǵyn aıta otyryp, jyl kóleminde qala ákimdigine qarasty mekemelerde sybaılas jemqorlyq faktileri tirkelmegenine erekshe toqtaldy. Bul sybaılas jemqorlyq táýekelderiniń aldyn alý baǵytynda júrgizilgen júıeli jumystardyń nátıjesi ekendigin atap ótti.