Almaty aýdanynyń turǵyn úı alaptarynda 2020 jyly 23 kóshege asfalt tóseldi, 24 kóshede jaryq qalpyna keltirildi, 300 km gaz taratý jelileri salyndy. Bul týraly qala ákimi Altaı Kólginov aýdan turǵyndarymen kezdesý barysynda aıtty, dep habarlaıdy Egemen.kz elorda ákimdiginiń resmı saıtyna silteme jasap.
«Kezdesý barysynda barlyq sanıtarııa normalary saqtaldy. Qala turǵyndarymen kezdesýler, azamattardy qabyldaý, jumys saparlary ózara baılanysty aıtarlyqtaı kúsheıtýge múmkindik beredi. 2020 jyly Almaty aýdanynda kóptegen jumys atqaryldy. Memleket basshysy elordanyń eldi-mekenderin josparly túrde damytýdy tapsyrdy. Máselen, tek osy aýdannyń eldi-mekenderinde 23 kóshe asfalttaldy, al erigen jáne jańbyr sýlaryn burý úshin aryqtar ornatyldy. 24 kóshede jaryqtandyrý qalpyna keltirildi, qalany gazdandyrý boıynsha jumystar júrgizilýde - 300 km gaz taratý jelileri salyndy», deıdi ákim.
Onyń aıtýynsha 2020 jyly 21 mektep pen 2 balabaqsha jóndeldi, bıyl taǵy 9 bilim berý nysanyn jóndeý josparlanyp otyr. Sonymen qatar, Mıchýrıno eldi-mekeninde 3 mektep salyndy. Buryn bul eldi-mekende mektep bolǵan joq, balalar beıimdelgen bólmede oqydy.
TKSh salasynda da úlken jumys júrgizildi: 19 úıde kúrdeli jóndeý júrgizildi, 80 úıde jylýmen jabdyqtaý, sýmen jabdyqtaý jáne káriz júıeleri jóndeldi.
«Qala turǵyndary 60-qa jýyq másele kóterdi: turǵyn úı alaptaryn damytý, áleýmettik nysandar, joldar salý, abattandyrý, apatty úılerdi buzý, TKSh jańǵyrtý jáne t.b. Turǵyndar kótergen máseleler baqylaýǵa alyndy. Buǵan deıin osyndaı kezdesýlerdi Saryarqa jáne Esil aýdandarynda ótkizdik», - dep jazdy qala ákimi.