Almaty oblysy Alakól kólinde byltyr bastalǵan jaǵalaýdy bekitý jumystaryn bıyl aıaqtaý kózdelip otyr. Sonyń nátıjesinde Alakól jaǵalaýy uzyndyǵy 13,55 km bolatyn qorǵanys qurylysymen bekemdene túspek. Onyń 10,150 shaqyrymy – Aqshı, 3,4 km Kóktuma jaǵynan ornatylýda. Jaǵalaýdaǵy qorǵanys dambasy 3 metrlik tolqynǵa tótep beredi, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Oblystyq qurylys basqarmasynyń málimetine súıensek, kóldiń lıtodınamıkalyq júıesin saqtaı otyryp, jaǵalaýdyń odan ári buzylýyn boldyrmaý jáne osy aýmaqtyń rekreasııalyq tartymdylyǵyn arttyrý jáne Aqshı men Kóktumdaǵy ǵımarattar men qurylystardy paıdalaný kezindegi qaýipsizdikti qamtamasyz etý maqsatynda Alakól kóli bógetiniń qurylysy jobasy júzege asyrylady. Jobany iske asyrý óz kezeginde jasandy jaǵajaılar qurý arqyly jaǵalaýlardy qorǵaýǵa múmkindik beredi, al jaıaý júrginshiler jaǵalaýynyń qurylysy Aqshı men Kóktum aýmaǵynda ornalasqan demalys aımaqtarynyń rekreasııalyq áleýeti men tartymdylyǵyn aıtarlyqtaı jaqsarta túspek. Bul óz kezeginde aımaqtyń ekonomıkalyq damýyna yqpal etedi.
Jaǵalaýdaǵy qorǵanys bógeti 3 m bıiktiktegi tolqyndarǵa tótep berýge laıyqtalǵan, bul jasandy bóget maltatas jaǵajaıynyń qalyptastyrýyna baılanysty jasalǵan. Jasandy maltatas jaǵajaıy jaǵalaý aımaǵynda tabıǵı sý almasýdy saqtaýǵa yqpal etedi, sý óziniń tazalyǵy men móldirligin saqtaıdy.
Atap ótsek, iske asyrylyp jatqan joba «Qorshaǵan ortany qorǵaý obektilerin damytý» bıýdjettik baǵdarlamasy aıasynda júzege asyrylyp jatyr. Qurylys jumystarynyń jalpy quny - 6,8 mlrd teńge.
Alakól aýdandyq ákimdiginiń málimetine qaraǵanda, aıdyndy Alakólde 264 demalys orny jumys isteıdi. Olar kúnine 23 myńnan astam týrısti qabyldap, qyzmet kórsetýge qaýqarly. Máselen, ótken jyly Alakól jaǵalaýynda saıabaq pen jaǵajaı voleıboly, fýtbol jáne úlken tennıs alańdary jasalyp, qoldanysqa berilgen edi. Sol sııaqty keń kólemdi amfıteatr salynyp, sýburqaq iske qosylǵan. Jalpy 2020 jyly kól jaǵalaýynda demalýshylarǵa 4 mlrd 790 mln teńgeniń qyzmeti kórsetilgen.