Osydan dál 65 jyl buryn, ıaǵnı 1956 jyldyń 5 aqpanynda Italııanyń Kortına d'Ampesso qalasynda VII qysqy Olımpııa oıyndarynyń alaýy sóngen edi.
Aıtýly jarysta 32 memleketten kelgen 821 sportshy baq synady. Olar segiz sport túri boıynsha 24 júlde jıyntyǵyn sarapqa saldy. KSRO quramasy qysqy Olımpıadaǵa tuńǵysh ret qatysyp otyrǵanyna qaramastan jalpy komandalyq esepte kósh bastady. Odaqtyń oǵylandary 16 júldege (7 altyn+3 kúmis+6 qola) qol jetkizdi. Ekinshi oryndy Aýstrııa (4+3+4) enshilese, úshinshi satyǵa Fınlıandııa (3+3+1) taban tiredi. Sondaı-aq, Shveısarııa (3+2+1) men Shvesııa (2+4+4) úzdik bestikti qortyndylady. Barlyǵy 10 eldiń ǵana órenderine júldeli oryndar buıyrdy. Jekelegen sportshylar arasynan shvesııalyq shańǵyshy Sıksten Ernberg pen aýstrııalyq taý shańǵyshy Tonı Zaılerdi bóle-jara ataýǵa bolady. Alǵashqysy tórt ret jeńis tuǵyryna kóterilse, ekinshisi úsh birdeı bas júldeni qanjyǵasyna baılady.
Apennın túbeginde ótken baıraqty básekede 11 dúrkin KSRO chempıony jáne 21 dúrkin júldegeri degen ataǵy bar qazaqstandyq Aleksandra Artıomenko óner kórsetti. Taý shańǵysyn serik etken jerlesimiz Olımpııa oıyndarynda 14 oryndy qanaǵat tutty.