Sońǵy táýlikterde oblys «qyzyl aımaqtyń» qursaýynda. Saqtandyrý baǵytyndaǵy úgit-nasıhat jumystary júrgizilgenimen, qaýiptiń betin qaıtarý ázirge múmkin bolmaı tur. Qańtar aıynda óńirde 3 615 adam indet juqtyrdy. Onyń 253-i mektep oqýshysy.
Qaýipti dert qarmaǵan oqýshylar, negizinen Kókshetaý qalasynda. Ázirge oblys ortalyǵyndaǵy 11 mektep karantınge jabyldy. Osy oraıda birden aıta ketetin usynys, qyzyl aımaqtyń» qaterinen qutyla almaı turǵanda bilim oshaqtaryndaǵy oqý-tárbıe jumystaryn tolyǵymen onlaın júıesine kóshirsek qalaı bolady eken? Sońǵy táýlikte 20 oqýshy indetke shaldyqty. Olardyń deni mektepke baryp bilim alyp júrgen balalar.
– Barlyq bilim oshaqtary dezınfeksııalaý jumystaryn júrgizip, saqtandyrý sharalaryna muqııat bolǵanymen, ahýal osyndaı bolyp tur, – deıdi Kókshetaý qalalyq bilim bóliminiń ádiskeri Gúlnar Jaılaýova.
Búgingi tańda bilim oshaqtaryndaǵy jaǵdaı shyn mánisinde alańdatarlyq. О́tken bir aıdyń ishinde júzden astam oqýshy «jaman tumaý» dertine shaldyǵyp otyr. Jalǵyz oqýshylar ǵana emes, muǵalimder de koronavırýs juqtyrǵan.
– Oqý jyly bastalǵaly 243 oqýshydan koronavırýs anyqtaldy, – deıdi Kókshetaý qalasynyń bas sanıtarlyq dárigeri Qanat Ysqaqov. Taldaý jasap qarasańyz, osy balalardyń 26-sy ǵana onlaın júıe arqyly bilim alǵan eken. Qalǵandary mektepterde bilim alǵan. Demek, qaýip oqý ornynda kóp degen sóz. Mysaly, bir bilim oshaǵynda dert juqtyrǵanyn ańǵarmaǵan muǵalim bes birdeı synyptyń oqýshysyna sabaq bergen. Sonyń saldarynan 100-den astam oqýshy karantınge jiberildi.
Oblys boıynsha 38 bilim berý mekemesi jabyldy. Ásirese, Sandyqtaý jáne Zerendi aýdandarynda qaterli dertke shaldyǵý oqıǵalary kóp. Sondyqtan, qaýip seıilgenshe barlyq bilim oshaqtary onlaın júıesi arqyly jumys istese, jas tolqynǵa degen qaýip-qater azaıar ma edi degen tilegimizdi taǵy bir qaıtalap aıtýǵa týra kelip tur.
KО́KShETAÝ