Premer-Mınıstr Asqar Mamın «Digital Almaty 2021: sıfrlyq qaıta jańǵyrý: jańa jaǵdaıǵa serpilis» forýmynyń ashylýyna qatysty, dep habarlaıdy Egemen.kz.
Forým QR Prezıdenti Qasym-Jomart Toqaev pen Dúnıejúzilik ekonomıkalyq forým prezıdenti Berge Brendeniń beıne úndeýlerinen bastaldy. Onlaın rejıminde Google-diń vıse-prezıdenti Vınt Serf sóz sóıledi. Forýmnyń plenarlyq sessııasyna Armenııa Premer-Mınıstri Nıkol Pashınıan, Belarýs Premer-Mınıstri Roman Golovchenko, Qyrǵyzstan Premer-Mınıstri Ýlýkbek Marıpov, Reseı Premer-Mınıstri Mıhaıl Mıshýstın, О́zbekstan Premer-Mınıstri Abdýlla Arıpov, EEK Alqasynyń tóraǵasy Mıhaıl Mıasnıkovıch, Kaspi.kz negizin qalaýshylardyń biri Mıhaıl Lomtadze men ERG dırektorlar keńesiniń tóraǵasy Aleksandr Mashkevıch qatysty.
Forýmnyń plenarlyq sessııasynda sóılegen sózinde QR Premer-Mınıstri pandemııa jaǵdaıynda Qazaqstan ekonomıkasy turaqtylyqtyń joǵary deńgeıin kórsetkenin, bul edáýir dárejede memlekettik jáne jekemenshik sektorlardyń barlyq salalaryna sıfrlyq sheshimderdiń engizilýiniń ósýimen baılanysty ekenin atap ótti.
«Aıqyn shekteýlerge qaramastan, biz sıfrlyq ınfraqurylymnyń qoljetimdiligi men sapasyn arttyrý jumysyn jedeldettik. 2020 jyly 20 myń talshyqty-optıkalyq baılanys jelisiniń qurylysy boıynsha MJÁ jobasy aıaqtaldy. 1 000-nan astam mobıldi baılanystyń bazalyq stansııasy ornatyldy, bul óńirlerdegi tehnologııalyq teńsizdik deńgeıin aıtarlyqtaı qysqartýǵa múmkindik berdi. Sonyń nátıjesinde Qazaqstan halqyn ınternetpen qamtý búginde 99%-dy quraıdy», — dedi A. Mamın.
Úkimet basshysy QR azamattary úshin tulǵa bıometrııasy boıynsha qashyqtan sáıkestendirý arqyly elektrondyq sıfrlyq qoltańbany (ESQ) qashyqtan alý múmkindigi berilgenin atap ótti. Jıyntyqty qujat aınalymy, mobıldi jumys orny, kadrlyq ákimshilendirýge jáne áleýmettik tólemderge onlaın tásilder qoldaný sekildi jobalar belsendi engizilýde. Onlaın formatta qoljetimdi memlekettik qyzmetterdiń úlesi 93%-ǵa deıin jetkizildi.
Sonyń nátıjesinde, 2020 jyly Qazaqstan elektrondyq úkimetti damytý deńgeıi boıynsha BUU reıtınginde 10 pozısııaǵa kóterilip, 193 eldiń arasynda 29-orynǵa ıe boldy. Bólshek saýda qurylymyndaǵy elektrondyq saýda kólemi ótken jyly 3 esege jýyq – 3,8%-dan 9,7%-ǵa deıin ósti. Halyqtyń qolma-qol aqshasyz operasııalarynyń kólemi 2,5 esege, 14,1 trln teńgeden 35,3 trln teńgege deıin ulǵaıdy.
«Memleket basshysy Qasym-Jomart Kemeluly Toqaev bıylǵy jyldy memleketimizdi tıimdi sıfrlandyrý jyly dep ótkizýdi tapsyrdy. Qazirdiń ózinde biz "aýqymdy derekter" qaǵıdattaryn memlekettik organdardyń jumysyna tereń ıntegrasııalaý boıynsha jumys júrgizip jatyrmyz. "Data-driven government" tujyrymdamasy sheńberinde derekterdi jınaý jáne óńdeý ázirleýden bastap, tıimdilik monıtorıng júrgizýge deıingi barlyq kezeńderde memlekettik qyzmetterdiń sapasyn arttyrýdyń faktoryna aınalady», — dedi A. Mamın.
Premer-Mınıstr sıfrlyq ınfraqurylymdy damytý aıasynda aldaǵy 5 jyl ishinde Qazaqstannyń barlyq oblys ortalyqtary men respýblıkalyq mańyzy bar qalalary 5G jabynymen qamtamasyz etiletinin atap ótti. Derekterdi óńdeý jáne saqtaý salasyna ınvestısııalar 6 esege artady (82 mlrd teńgeden 500 mlrd teńgege deıin). Elektrondyq saýdanyń úlesi 2 ese ulǵaıtylatyn bolady.
«Sıfrlyq salada bıznesti qoldaý sharalarynyń arqasynda 1000-nan astam ınnovasııalyq kompanııa qurylady, bul AKT eksporty kóleminiń 25 eseden astam ósýine ákeledi. AT-salasynda shamamen 100 myń jańa jumys orny qurylady, bul synı massany qalyptastyrýǵa jáne ekonomıkanyń barlyq salalarynda mýltıplıkatıvtik áserdi iske qosýǵa kómektesedi», — dedi A. Mamın.
Forýmǵa qatysýshylar Qazaqstannyń memlekettik qyzmetterdi kórsetý, fıskaldyq derekterdi saraptaý, sondaı-aq qarjy-bank jáne telekommýnıkasııa salalaryndaǵy sıfrlyq jobalar kórmesimen tanysty.