Pavlodar oblysynda qaban atqan brakonerler sot aldynda jaýap beredi, dep habarlaıdy Egemen.kz Polisia.kz saıtyna silteme jasap.
«2021 jylǵy 5 aqpanda saǵat 00.05-te Pavlodar oblysy Polısııa departamenti Krımınaldyq polısııa basqarmasynyń jedel qyzmetkerleri Novoıamyshevo aýylynyń janyndaǵy «Omby-Maıqapshaǵaı» avtojolynyń 463 shaqyrymynda 30 jastaǵy pavlodarlyq azamat basqaryp kele jatqan «Nıva» avtokóligin ustady. Kóliktiń salonynda júrgizýshiden basqa taǵy eki er adam bolǵan. Sondaı-aq olarda kóliktiń tirkemesi, qarda júrgish kólik jáne túrli markaly alty myltyq boldy, barlyq myltyqtar ishki ister organdarynda tirkelgen. Oqıǵa ornyn tekserý kezinde 50 metr qashyqtyqta jabaıy qabannyń óli denesi tabyldy. Polısııa qyzmetkerleri 2021 jylǵy 4 aqpanda saǵat 13.00 shamasynda er adamdardyń Aqqýly aýdanynyń aýmaǵynda tıisti ruqsatsyz zańsyz ań aýlaǵanyn anyqtady», dedi Pavlodar aýdany polısııa bóliminiń bastyǵy Dýlat Tókenov.
Polısııa qyzmetkerleri atalǵan faktiniń tirkelgenin atap ótti. Tıisti saraptamalar taǵaıyndaldy. Tekseris júrgizilýde. Avtomashına, tirkeme jáne qarda júrgish kólik arnaıy aıyppul turaǵyna qoıyldy.