Qazaqstan azamaty bola tura shetel azamattyǵyn resimdep alyp, qos eldiń arasynda erkin saırandap júrgisi keletinder Qostanaı oblysynda da azaımaı tur. Oblystyq kóshi-qon qyzmetiniń málimetinshe, byltyr ózge eldiń azamattyǵyn qabyldaǵanymen, áli kúnge deıin Qazaqstan Respýblıkasynyń tólqujatymen júrgen 63 adam ákimshilik jaýapqa tartylǵan.
О́zge eldiń azamattyǵyn ala tura, munysyn resmı oryndardan uzaq ýaqyt boıy jasyryp kelgen turǵyndar da jeterlik. О́tken jyly dál osyndaı úsh azamat elden alastatylyp, 5 jyl merzimge Qazaqstanǵa qaıtyp oralý quqyǵynan aıyryldy.
– Zań oryndarynyń qatań talap qoıǵanyna qaramastan, ekinshi eldiń azamattyǵyn qabyldap «eki jep, bıge shyqqysy» keletinderdiń qatary tyıylar emes. Kóbi shekaranyń eki betinde de erkin júrgisi keledi. Eki elden birdeı zeınetaqy alyp otyrǵandar da tabylady. Olar QR ÁQBtK-niń 496-baby boıynsha ákimshilik jaýapkershilikke tartylýda. El Konstıtýsııasynyń 10-baby men «Azamattyq týraly» zańnyń 3-babyna sáıkes, Qazaqstan azamatyna basqa memlekettiń azamattyǵyn qosarlap alýǵa tyıym salynady. Shet memlekettiń azamattyǵyn qabyldaǵan adam ózge azamattyqa ıe bolǵan kúnnen keıin otyz kún ishinde mindetti túrde bizge habarlasyp, Qazaqstan Respýblıkasynyń pasporty men jeke kýáligin qaıtaryp berýi kerek. Bulaı bolmaǵan jaǵdaıda Qazaqstan pasportyn zańsyz paıdalanǵany úshin 100 aılyq eseptik kórsetkish mólsherinde, sondaı-aq shetel azamattyǵyn alǵany týraly zańda belgilengen merzim ishinde habarlamaǵany úshin 200 aılyq eseptik kórsetkish mólsherinde aıyppul salynady. Tipti ákimshilik tártippen shekaradan shyǵarylyp jiberilýi de múmkin, – deıdi oblystyq Polısııa departamenti kóshi-qon basqarmasynyń basshysy Qaırat Dútpaev.
Qos pasportpen júrgen azamattardy buryn anyqtaý qıyn bolǵanymen, keıingi jyldary júzege asyrylǵan sıfrlandyrýdyń nátıjesinde bul baǵyttaǵy jumystar da edáýir ilgerileı bastaǵan.
Basqarma basshysynyń aıtýynsha, múddeli memlekettik organdar tarapynan qandaı da bir azamattyń qos tólqujatpen júrgeni anyqtalǵan jaǵdaıda, bul aqparat jedel túrde oblystyń kóshi-qon qyzmetine jiberiledi. Resmı oryndardyń mundaı yntymaqtastyǵy zańdy belden basqandardyń jolyn kesýge aıtarlyqtaı septigin tıgizip otyr.
– Zeınetaqy tólemderin júzege asyratyn memlekettik organdarmen birlesip jumys istep jatyrmyz. Qazaqstannan bir, shetelden eki zeınetaqy alyp otyrǵan azamattar bar. Olardyń deni osydan 10-15 jyl buryn shetel azamatyn qabyldap, keıin raıynan qaıtyp Qazaqstanda qalyp qoıǵan egde jastaǵy adamdar. Mysaly, byltyr Rýdnyı qalasynda Reseı azamattyǵyn alǵan 5 adam anyqtalyp, barlyǵy ákimshilik jaýapqa tartyldy. Mundaı azamattar eki elden zeınetaqy alyp otyrǵanyna qaramastan, kóbine qýlyqqa basyp zań talaptarynan habarsyz adamnyń keıpine enip, jazadan jaltaryp ketýge tyrysady. Biraq zań – jalpyǵa ortaq, – deıdi Q.Dútpaev.
Qostanaı oblysy