Aqtóbe qalasynda 2005-2006 jyldary týǵan jasóspirimder arasynda ótken Qazaqstan chempıonatynda Qaraǵandy oblysynyń boksshylary tamasha óner kórsetti, dep habarlaıdy Egemen.kz oblystyq Dene shynyqtyrý jáne sport basqarmasynyń baspasóz qyzmetine silteme jasap.
Jarys qorytyndysynda qaraǵandylyq bylǵary qolǵap sheberleri Temirlan Kemerhan, Islam Sovetov jáne Madııar Taıpaqov chempıon atandy. Kúmis júldege Damır Baıpaqov, Madııar Otar jáne Nurjan Dýman ıe bolsa, Nıkıta Mamasahlıshvılı qola medaldi qanaǵat etti. Sóıtip, Qaraǵandy oblysynyń quramasy komandalyq esepte birinshi oryndy jeńip aldy.
Sondaı-aq dál osy mezgilde Almaty qalasynda da bokstan 2003-2004 jyldary týǵan qyzdar jáne 2005-2006 jyldary dúnıege kelgen jasóspirim boksshylar arasynda el chempıonaty ótken bolatyn.
Bul týrnırde de qaraǵandylyq jas boksshylar nátıjeli óner kórsetip, namysty qoldan bermedi. Atap aıtqanda, Qaraǵandy oblysynyń qurama komandasy tórt altyn jáne bir kúmis júldege, sondaı-aq bes qola medalǵa ıe boldy.