Batys Qazaqstan oblystyq Ishki ister departamenti jol sapasyn jaqsartýǵa baılanysty buǵan deıin berilgen usynymhattardy oryndamaǵany úshin «Qazaqavtojol» mekemesine qatysty 2 hattama toltyryp, materıaldardy sotqa joldady.
Polısııanyń habarlaýynsha, oblys aýmaǵynda aýa raıynyń qolaısyzdyǵynan 16 márte jol-kólik oqıǵasy bolyp, kólik ıeleri materıaldyq shyǵynǵa batqan. Joldyń sapasyna jaýap beretin 17 laýazymdy tulǵanyń ákimshilik jaýapkershilikke tartylǵany belgili boldy. Odan bólek, halyqaralyq jáne respýblıkalyq mańyzy bar joldardy qar men muzdan tazartý jónindegi uıǵarymdy ýaqytynda oryndamaǵany úshin «Qazaqavtojol» mekemesiniń oblystyq fılıalyna qatysty is Oral qalalyq mamandandyrylǵan ákimshilik sotyna joldanǵan.
Batys Qazaqstan oblysy aýmaǵynda respýblıkalyq mańyzy bar joldardyń uzyndyǵy – 1414 km. Osy joldy bıyl kútip ustaýǵa respýblıkalyq bıýdjetten 850 mln teńge bólingen.
Sońǵy kúnderi oblys aýmaǵynda jańbyr jaýyp, tuman túsip, jol qatynasy qıyndady. 1 aqpan kúni Oral-Atyraý tas jolynda Lada Largýs jáne Datsun avtokólikteri bir-birine soǵylyp, 7 adam Aqjaıyq aýdandyq aýrýhanasyna jatqyzylǵan.
3 aqpan kúni oblysta qalyń tuman men kóktaıǵaq qaterine baılanysty tótenshe jaǵdaılar departamenti habarlama taratqan edi. Polısııa avtokólikterdi Oral qalasynan shyǵarmaı jatyr.
Batys Qazaqstan oblysy