Qazaqtyń qubylysqa aınalǵan kórnekti aqyny Qadyr Myrza Álı «О́zge tildiń bárin bil, óz tilińdi qurmette!» deýshi edi. Árıne, ana tilińdi jetik meńgergenge ne jetsin. Osy oraıda H.Dosmuhamedov atyndaǵy Atyraý memlekettik ýnıversıteti tyń bastamany qolǵa aldy. Bul – atalǵan oqý ornynda bilim alatyn sheteldik stýdentterge bes tildi úıretetin arnaıy kýrs.
– Bizdiń bastamamyzdy iske asyrýǵa oblys ákimdigi qoldaý bildirdi. Al sheteldik stýdentter úshin ashylǵan kýrsta qazaq, aǵylshyn, orys, túrik jáne qytaı tilin úıretý kózdelip otyr. Bul bastamaǵa Kaspıı mańy elderindegi joǵary oqý oryndarynyń mamandary da, atyraýlyq erikti stýdentter de atsalysady. Basty maqsat – Qazaqstan Respýblıkasynyń Prezıdenti Qasym-Jomart Toqaevtyń qazaq tilin ultaralyq qatynas tili deńgeıine kóterý tapsyrmasyna úles qosý. Ásirese sheteldik stýdentterdiń qazaq tilin tereń meńgerýine jol ashylady, – deıdi Salamat Idrısov.
Rektordyń aıtýynsha, jeti jurttyń tilin meńgergen Alash qaıratkeriniń esimin ıelengen ýnıversıtette 200-den astam sheteldik stýdent oqıdy. Olardyń basym bóligi – Reseı Federasııasyndaǵy Astrahan oblysynyń turǵyndary.
Al oblystyq tilderdi damytý basqarmasynyń basshysy Ásııa Qystaýbaevanyń pikirinshe, ákimdik tarapynan qazaq tiliniń halyqaralyq qatynas tili retinde keń qanat jaıýyna qoldaý kórsetiledi. О́ıtkeni mundaı bastama shetelde turatyn qandastarymyzdyń ana tilin meńgerýine septigin tıgizedi.
– Osyǵan baılanysty oblystyq tilderdi damytý basqarmasy atalǵan kýrsta qolǵa alynǵan tájirıbe negizinde ádistemelik quraldar daıyndaýdy kózdep otyr. Sebebi mundaı talap Tilderdi damytý men qoldanýdyń memlekettik baǵdarlamasynda aıqyn kórinis tapty, – deıdi Ásııa Qystaýbaeva.
Atyraý oblysy