Oblys ákiminiń orynbasary Baqytgúl Hamenovanyń tóraǵalyǵymen ótken selektorlyq jıynda 117 balabaqshanyń qyzmetkerlerine jalaqy tóleý keshiktirilgeni belgili boldy, dep habarlaıdy Egemen.kz
Jıynǵa Atyraý qalasy men aýdandar ákimderiniń orynbasarlary qatysty. Baqytgúl Hamenovanyń aıtýynsha, óńirde bıyldan bastap oblystyq Bilim basqarmasy men bilim bólimderi oblystyq bıýdjetten qarjylandyrylady.
«Keıbir balabaqshalar men qosymsha bilim berý mekemelerinen basqasy tıisti eńbekaqysyn aldy. Qazir oblysta 149 balabaqsha bar. Onyń ishinde mektepke deıingi 117 mekemeniń qyzmetkerlerine qujattardyń kesheýildeýinen jalaqy keshiktirildi. Sondaı-aq, 17 qosymsha bilim berý uıymynyń ishinen 4 mekemeniń qyzmetkerlerine eńbekaqy tólendi» dedi oblystyq Bilim basqarmasy basshysynyń orynbasary Tolǵanaı Kólbaeva.
Oblys ákiminiń orynbasary Baqytgúl Hamenova osyǵan baılanysty tıisti basshylarǵa bilim berý mekemelerindegi eńbekaqynyń keshiktirilý sebebin anyqtaýdy, máseleni jedel sheshýdi tapsyrdy.
«Muǵalim men dáriger qaı kezde de qoǵam damýynyń jetekshi kúshi sanaldy. Olardyń artynda eńbekaqyǵa qarap otyrǵan tutas januıa bar. Otbasy, adam taǵdyryn oılasaq, jalaqyny keshiktirý, bermeý degen másele týyndamaýy kerek. Sondyqtan, atalǵan bilim berý uıymdary qyzmetkerleriniń eńbekaqysyn keshiktirmeı, aqpan aıynyń 10-yna deıin berý kerek. Budan bylaı aqpan, naýryz aılarynyń eńbekaqysy ár aıdyń 25-inde ýaqytyly tólenip otyrady. Ony ózim qadaǵalaıtyn bolamyn» dedi Baqytgúl Hamenova.