Halyqaralyq týrnırde dara shyqty

Elordada uıymdastyrylǵan baı­raq­ty báseke aldyndaǵy baspasóz más­lıhatynda Qazaqstan Hokkeı fede­rasııasynyń bas dırektory Gleb Karataev jospar boıynsha Nur-Sul­tanǵa Ońtústik Koreıa komandasy men Eýropanyń taǵy tórt quramasy qaty­sýǵa nıet bildirgenimen, sol el­­der­degi tótenshe jaǵdaı men ka­ran­­tın shekteýlerine baılanysty Qazaq­stanǵa kele almaǵanyn málim­dedi. Úsh quramamen tolyqqandy jarys ótkizý qolaısyz bolǵandyqtan, uıym­dastyrýshylar Qazaqstannyń jas­tardan quralǵan ekinshi komandasyn shyǵarýǵa májbúr bolǵan.

– Sondyqtan múmkindiginshe kóp oıynshynyń daıyndyǵyn tekserý úshin biz Qazaqstannyń farm-quramasyn jasaqtap shyǵardyq. Ońtaıly quramdy jınap, barlyq jigitterdiń shamasyn baıqaýǵa bul taptyrmas múmkindik boldy. Mundaı jaǵdaı bizde tek álem chempıonatynyń aldyndaǵy jıyndarda ǵana bolatyn edi. Endi aldaǵy ýaqytta da osyndaı týrnır udaıy ótip otyrady dep úmittenemiz. Biz buryn mundaı do­dalarǵa qatysyp júrgenimizben, óz elimizde uıymdastyrmaǵan bolatyn­byz. Shaıbaly hokkeıdi keńinen nasıhattaý úshin halyqaralyq týr­nırlerdi Qazaqstannyń ózge de aımaq­tarynda, atap aıtar bolsaq, Almaty nemese Qara­ǵandyda da ótkize alamyz. Osylaısha elimizdegi arenalar halyqaralyq stan­darttarǵa saı bolmaq. Týrnır halyq­aralyq, jol­dastyq sıpatqa ıe, sondyqtan eki qura­manyń bapkerleri qandaı da bir máselelerdi sheshý úshin oıynshylarmen almasýǵa quqyly bolady, sol sebepti de týrnırdiń qyzyǵy artpaq, – dedi Gleb Karataev.

Al bas bapkeri Iýrıı Mıhaılıs quramalardy «Barys» pen «Nomad­tyń» bapkerler shtaby iriktep alǵa­nyn aıtty. «Biz eki quramany ja­saqtap, muzaıdynǵa shyǵýǵa daıyn degen barlyq jas oıynshyny irik­tep aldyq. Iаǵnı, aldaǵy ýaqytta ulttyq komandaǵa alýymyz múmkin degen úmitpen shaqyrdyq. «Barystyń» kóshbasshy oıynshylaryna demalys berdik, óıtkeni bilesizder bizdiń jigitter naýryz aıynda Qurlyqtyń hokkeı lıgasynyń pleı-off kezeńinde baq synaıdy. Sondyqtan bul týrnırge Qazaqstan chempıonatyndaǵy jáne «Barysta» az oıyn tájirıbesin alyp júrgen oıynshylardy jınadyq», dedi bas jattyqtyrýshy.

Týrnırdegi básekelerge toqtalar bolsaq, Qazaqstannyń negizgi quramy ja­rystaǵy tusaýkeser kezdesýin Be­la­rýs hokkeıshilerimen ótkizip, iri esep­pen jeńiske jetti. Match bas­talǵan sátte oıyn tizginin qolǵa alǵan jer­les­terimiz á degennen esep ashyp úlgerdi. Kezdesýdiń 8-mınýtynda Egor Petýhov ny­sanany dál kózdedi. Arada 20 sekýnd ótkende Pavel Akolzın ekinshi shaıbany qaq­paǵa toǵytty. Úzilisten keıin de basym­dyqty óz qoldaryna alǵan Qazaq­stannyń hokkeıshileri taǵy eki márte qaqpany dál kózdedi. 29-mınýtta Kırıll Panıýkov tablodaǵy kór­setkishti 3:0-ge jetkizse, 38-mınýt­ta Álıhan Ásetov Belarýs qaq­pa­sy­na tórtinshi goldy saldy. Úshin­shi ke­zeńde qarsylastar bizdiń qaq­paǵa eki shaıba soqqanymen, artynsha Kırıll Pa­nıýkov (47-mınýt) dýbl avtory ata­nyp, matchtyń núktesin qoıdy. Esep – 5:2.

Halyqaralyq týrnırdi sátti bastaǵan jerlesterimiz keıingi matchta da jankúıerlerdi qýantty. Re­seı hokkeıshilerimen ótken oıynda 2:1 nátıjesimen basym tústi. Birinshi kezeńniń orta tusyna deıin oıynshylar bir-biriniń qaqpasyna gol soǵa almady. Degenmen, kezekti bir sha­býyldy sátti túıindegen aıdyn ıeleri oıynnyń 14-mınýtynda esepti ashty. Roman Starchenkodan tamasha pas alǵan Nıkıta Mıhaılıs Qazaqstan quramasyn alǵa shyǵardy. Úzilisten keıin qonaqtar esepti jyldam teńestirip ketti. Matchtyń 25-mınýtynda Ilıa Morozov gol saldy. Sóıtip tablodaǵy kórsetkish oıynnyń 53-mınýtyna deıin saqtalyp turdy. Matchtyń aıaqtalýyna 7 mınýt qal­ǵanda Nıkıta Mıhaılıs dýbl jasap, Qazaqstan quramasyna jeńis syılady.

Osylaısha eki oıynda da qarsylas shaq keltirmegen Qazaqstan quramasy elorda tórinde uıymdastyrylǵan halyqaralyq jarysta el mereıin asyryp, baıraqty básekede top jardy. Týrnır qorytyndysy boıynsha Qazaqstan quramasynan eki birdeı oıynshy – Kırıll Panıýkov pen Andreı Shýtov úzdik dep tanyldy.

Qazaqstannyń ekinshi quramy birinshi oıynda Belarýs quramasynan overtaımda 3:2 nátıjesimen basym tússe, Reseıge qarsy ótken sheshýshi básekede dál osyndaı eseppen overtaımda qarsylastarǵa jol berdi.

Týrnır sońynda Qazaqstan qu­ramasynyń bas jattyqtyrýshysy Iýrıı Mıhaılıs muzaıdynǵa shyq­qan barlyq oıynshynyń óne­rine joǵary baǵa berip, jarysty uıym­dastyrýshylarǵa jáne Qazaq­stan chempıonaty qyzǵan shaǵyn­da komandalardyń kóshbasshy oıynshylaryn týrnırge jibergen klýb basshylaryna alǵysyn aıtty.